• Un informe do Consello Empresarial Mundial para o Desenvolvemento Sostible e One Planet Network, revela que a adopción deste Protocolo nos sectores de manufactura, construción, transporte e agricultura, daría lugar a reducións substanciais no uso de materiais, emisións de carbono e outros indicadores ambientais

Cerceda, a 9 de outubro de 2024.- Segundo o informe «Global Circularity Protocol for Business (GCP) – Impact Analysis on Climate, Nature, Equity and Business Performance», publicado recentemente polo Consello Empresarial Mundial para o Desenvolvemento Sostible (WBCSD) e a Rede One Planet (OPN), auspiciada polo PNUMA, unha iniciativa global de circularidade podería aforrar ata 120.000 millóns de toneladas de materiais e reducir ata un 7% as emisións de gases de efecto invernadoiro (GEI) de aquí a 2050.

As principais conclusións do informe indican que o Protocolo Global de Circularidade (GCP, polas súas siglas en inglés) ten o potencial de impulsar algúns dos seguintes impactos:

• Prácticas empresariais circulares: agárdase que sexa un catalizador para un rápido avance na madurez circular, co potencial de duplicar o ritmo ao que madura a circularidade empresarial.

• Consumo de materiais: ten o potencial de reducir o consumo mundial de materiais entre un 4% e un 5% entre 2026 e 2050. O aforro acumulado adicional de materiais neste período é de 100.000 a 120.000 millóns de toneladas e equivale á cantidade de material que se consome actualmente ao ano.

• Impacto climático: podería supoñer unha redución adicional das emisións de GEI de entre o 6% e o 7% anual durante o período 2026-2050, o que equivale a un aforro acumulado de CO2eq de entre 67 e 76 gigatoneladas. En comparación, isto supón entre 1,3 e 1,5 veces as emisións mundiais anuais actuais, e equivale a 12 veces as emisións anuais actuais de Estados Unidos ou a 5 veces as emisións anuais de China.

• Conservación da natureza a través dunha diminución adicional da contaminación atmosférica (PM2,5), dunha media do 11% ao 12% anual, entre 2026 e 2050.

O GCP é un marco integral para guiar ás empresas na medición, o establecemento de obxectivos, a divulgación e a presentación de informes sobre a eficiencia dos recursos e o rendemento da circularidade, co obxectivo xeral de acelerar a transición circular e, á súa vez, reducir o consumo global de materiais e os impactos ambientais. Trátase, polo tanto, dunha ferramenta esencial para as empresas de todo o mundo, xa que ofrece un enfoque estandarizado que poden adoptar para acelerar a súa transición cara a unha economía circular.

A análise revela que uns índices elevados de adopción do GCP en catro sectores de gran impacto -manufactura, construción, transporte e agricultura- darían lugar a reducións substanciais no uso de materiais, as emisións de carbono e outros indicadores ambientais.

O GCP ten como obxectivo entregar a primeira versión do Protocolo para 2025 na COP30 e conta con catro liñas de traballo estratéxicas: (1) Análise de Impacto Circular, (2) Sistema Corporativo de Rendemento e Responsabilidade (CPAS) para a Circularidade, (3) Marco Político para a Circularidade e (4) Obxectivos Científicos para a Circularidade. As liñas de traballo reciben orientación estratéxica e técnica dos comités consultivos de políticas, empresas e científicos independentes, así como dos grupos de traballo técnicos.

Fonte: Residuos Profesional

Imaxe: Pixabay