• Segundo recentes estimacións, estes materiais, que poden representar ata o 74% do consumo total de plástico da UE, non foron priorizados para a acción a través de directivas e políticas específicas, e tampouco están supeditados a obxectivos directos de reciclaxe ou reutilización

Cerceda, a 20 de decembro de 2022.- A Axencia Europea do Medio Ambiente (AEMA) publicou un novo informe que, baixo o título “Xestión de plásticos que non son de embalaxe nos fluxos de residuos europeos”, proporciona unha descrición xeral do consumo e a xestión dos plásticos que non entran na categoría de embalaxe.

Ata a data, estes materiais, que poden representar, segundo recentes estimacións, ata o 74% do consumo total de plástico da UE, non foron priorizados para a acción a través de directivas e políticas específicas, e tampouco están supeditados a obxectivos directos de reciclaxe ou reutilización.

Os plásticos que non son embalaxe están presentes en produtos destinados á construción de edificios e á fabricación de vehículos, pero tamén son frecuentes en artigos cotiáns tales como equipos electrónicos, deportivos, cueiros e cepillos de dentes, entre outros.

A día de hoxe, non hai suficiente información sobre o nivel xeral de consumo de plástico e a xeración de residuos plásticos en Europa, e é por isto que, desde a AEMA, considérase necesario desenvolver unha metodoloxía máis estandarizada para rastrexar os fluxos de plástico que non son de embalaxe, xa que permitiría unha vixilancia efectiva da cantidade total de refugallos plásticos producidos e proporcionaría unha evidencia mellorada para informar as decisións políticas e de investimento.

REGULACIÓN

Os instrumentos políticos clave da UE na área inclúen o Plan de Acción de Economía Circular e a Estratexia Europea para Plásticos nunha Economía Circular. O recente paquete Circular Economy II, proposto pola Comisión Europea, tamén contempla iniciativas sobre envases e plásticos de base biolóxica, compostables e biodegradables. Con todo, será necesario ter en conta o plástico utilizado en aplicacións que non sexan de embalaxe a través de posibles medidas futuras, como a introdución de esquemas de responsabilidade ampliada do produtor, obxectivos de reciclaxe de materiais específicos e obrigacións de notificación, aspectos que, a xuízo da AEMA, deberán abordarse se Europa quere xestionar mellor os fluxos totais de plástico no contexto da transformación cara a unha economía circular.

Fonte: Retema

Imaxe: Pixabay