• Así o manifestou no Círculo de Empresarios de Galicia, no marco dos Talleres Multiciplinares organizados en colaboración co IGAPE, onde achegou a súa visión e experiencia en torno ao impacto que, sobre as empresas, está a ter a actual normativa en materia de residuos

Cerceda, a 2 de abril de 2025.- No marco da edición 2024-2025 dos Talleres Multidisciplinares organizados polo Círculo de Empresarios de Galicia, en colaboración co Instituto Galego de Promoción Económica (IGAPE), e concibidos como espazo de debate e intercambio de coñecementos para abordar os principais retos e oportunidades que afectan o tecido empresarial galego,  a temática abordada o pasado 1 de abril centrouse na xestión de residuos e, máis concretamente, na nova normativa regulatoria.

Antonio Pena Seijo, Xerente de Coregal e membro de APROEMA (Asociación Profesional de Empresas Ambientais de Galicia), foi o relator invitado para achegar a súa visión e experiencia en torno ao impacto que está a ter sobre as empresas a Lei 7/2022, do 8 de abril, de Residuos e Solos Contaminados para unha Economía Circular, así como o novo Regulamento Europeo de Envases e Residuos de Envases.

Durante a súa intervención, Pena Seijo debullou as novidades lexislativas e proporcionou unhas orientacións para a súa correcta implantación, xa que traen consigo novas responsabilidades para empresas e industrias, afectando a toda a cadea de valor, desde a produción ata a reciclaxe e a valorización de residuos. Tal e como sinalou, “esta Lei non é nova, xa vén dunha Directiva Europea do 2018 un unha previa dez anos antes, así que estabamos avisados, e está claro que quen contamina paga e quen recicla aforra”.

Neste sentido, animou ás industrias a agruparse nos polígonos para xestionar os residuos industriais, priorizando “valorizar fronte a eliminar” e buscar asesoramento en especialistas, ademais de estudar como os SCRAP (Sistemas colectivos de Responsabilidade Ampliada do Produtor) poden axudar na xestión dos envases comerciais e industriais.

Adicionalmente, o xerente de Coregal abordou a xestión dos residuos municipais, na que se inclúe por primeira vez a obrigación das entidades locais a dispoñer dunha taxa destinada aos servizos que deben prestar en relación aos residuos  da súa competencia, que debería tender cara ao pago por xeración.

Xestor eficiente e voz autorizada no sector

Antonio Pena dirixe Coregal desde 2019 e conta cunha ampla experiencia no sector ambiental desde o ano 2007, xestionando anteriormente empresas como Cespa (Grupo Ferrovial) e Plastic Omnium. A súa traxectoria está marcada polo impulso de solucións sostibles, eficientes e aliñadas cos retos normativos, o que o converte nunha voz autorizada para interpretar e analizar o impacto das recentes modificacións legais no ámbito dos residuos e os envases.

Fonte e imaxe: Círculo de Empresarios de Galicia