• Así se desprende dos datos do Global Attitudes Survey do Pew Research Center, analizados por Funcas, e que se atopan en liña con outros recentemente publicados polo CIS
• O quecemento global percíbese máis intensamente como unha ameaza nas sociedades europeas, así como na xaponesa e surcoreana
• Se ben unha ampla maioría opina que en España débense facer cambios profundos na loita contra o cambio climático, cando se lle pregunta polas preferencias de gasto público, a protección do medio ambiente queda por baixo doutras partidas

Cerceda, a 8 de febreiro de 2023.-Segundo datos do Global Attitudes Survey do Pew Research Center, analizados por Funcas con motivo do Día Mundial da Acción fronte ao Quecemento Terrestre, celebrado o pasado 29 de xaneiro, as sociedades europeas meridionais (Grecia, Italia, Francia e España) destacan por percibir, de forma moi maioritaria, o quecemento global como unha ameaza para o propio país. De feito, ao redor de catro de cada cinco entrevistados subscriben esta opinión, unha proporción maior que a observada en países con máis tradición ecoloxista, como é o caso de Alemaña (73%) ou Suecia (70%).

O dato que ese estudo lanza para España (78%) está aliñado con outros recentemente publicados polo Centro de Investigacións Sociolóxicas (CIS), apuntando a que ao 80% dos entrevistados preocúpalles “moito” ou “bastante” o cambio climático. Pola súa banda, un 11% declara pouca preocupación e un 4%, ningunha (un 3% mesmo pon en dúbida a existencia do cambio climático).

En termos globais, a poboación mundial está cada vez máis concienciada de problemas tales como o quecemento global e os seus riscos, aínda que as diferenzas entre países son notables. Nas sociedades europeas, así como na xaponesa e surcoreana, a percepción do cambio climático como unha gran ameaza nacional atópase moi xeneralizada. As porcentaxes de persoas con esa percepción superan ás porcentaxes correspondentes a riscos de entidade como “a propagación de enfermidades infecciosas” ou os “ciberataques doutros países”.

Esta visión tan estendida do quecemento global como ameaza nacional (ademais de global) non a comparten algunhas sociedades non europeas. Por exemplo, en Israel, Estados Unidos, Malasia ou Singapur, as porcentaxes de persoas que ven nos ciberataques e a propagación de enfermidades infecciosas grandes ameazas para os seus respectivos países son máis altos que os de quen sinala o quecemento global.

Se ben unha ampla maioría opina que en España débense facer cambios profundos “na loita contra o cambio climático e o coidado do medio ambiente”, cando se lle pregunta polas preferencias de gasto público, a protección ambiental queda por baixo doutras partidas.  Máis da metade dos entrevistados opina que se debería gastar “moito máis” en sanidade e investigación e ciencia, mentres que menos dun de cada tres defende un gasto maior para preservar a contorna.

Pero unha cousa é mostrarse preocupado e comprometido para enfrontar a crise ambiental global, e outra adoptar condutas consistentes con esa preocupación en diferentes ámbitos (transporte, reciclaxe, consumo, etc.). Pasar da conciencia á acción requiriría, non só perseverar na difusión de valores ambientais e coñecementos sobre os riscos do deterioro ambiental, senón tamén informar de maneira realista sobre os custos e esforzos que conleva e, así mesmo, establecer estruturas de incentivos económicos para os individuos e fogares que se somen a esa loita.

A eficacia de semellante estratexia sería seguramente maior se, ademais, se ofrecesen á sociedade probas do compromiso real de gobernos e empresas coa acción polo clima e, polo tanto, da exemplaridade dos seus comportamentos.

Fonte: Compromiso RSE

Imaxe: Pixabay