• O obxectivo da reunión é avanzar na redacción do borrador preliminar do instrumento mundial, xuridicamente vinculante, para poñer fin á contaminación por plásticos a fin de que poida ultimarse en Busan (República de Corea) en decembro

• A humanidade produce actualmente 430 millóns de toneladas de plástico anuais, dous terzos das cales están contidas en produtos de vida curta que pronto se converten en refugallos

Cerceda, a 23 de abril de 2024.- A capital canadense, Ottawa, acolle a última rolda de negociacións sobre a creación dun instrumento mundial, xuridicamente vinculante, para poñer fin á contaminación por plásticos, contando coa participación de delegados de 174 países.

A reunión, que é a penúltima antes de que conclúan as negociacións a finais deste ano (que precisamente teñen lugar en medio do que os expertos denominaron unha crecente crise do plástico), arrincou hoxe e estenderase ata o próximo 29 de abril.

Desde a década de 1950, xeráronse 9.200 millóns de toneladas deste material, das cales 7.000 millóns convertéronse en refugallos, que se acumulan en vertedoiros e contaminan lagos, ríos, solos e océanos.

A humanidade produce actualmente 430 millóns de toneladas de plástico anuais, dous terzos das cales están contidas en produtos de vida curta que pronto se converten en refugallos. Parte dese plástico acaba na cadea alimentaria, onde pode danar a saúde humana.

O obxectivo da reunión é avanzar na redacción do borrador preliminar do instrumento mundial para que poida ultimarse en Busan (República de Corea) en decembro. Ata o de agora, as conversacións centráronse en reducir a contaminación durante todo o ciclo de vida dos plásticos, desde o seu deseño ata a súa eliminación.

O proceso de negociación iniciouse formalmente en 2022 no quinto período de sesións da Asemblea das Nacións Unidas para o Medio Ambiente, máximo órgano decisorio mundial en materia de medio ambiente. Foi aclamado como un momento histórico e, tras dous anos de traballo, o Comité Intergobernamental de Negociación pasou das opinións xerais a un proxecto de texto revisado.

“Aínda que o calendario para un acordo final considerouse ambicioso durante moito tempo, correspóndese coa urxencia da crise da contaminación por plásticos”, afirmou Mathur-Filipp,  Secretaria Executiva do Comité Intergobernamental de Negociación (INC).

Fonte e imaxe: ONU

Saúdos, Departamento de Comunicación