• Con esta partida, cedida por Sogama, xa son 55 as vivendas unifamiliares que participan nesta iniciativa, con interesantes beneficios ambientais e económicos.
• Os participantes recibirán manuais didácticos de apoio que lles resultarán de gran utilidade para coñecer con maior precisión a técnica a aplicar e obter así un compost de alta calidade que retornará á terra en forma de nutriente.

Cerceda, a 6 de novembro de 2020.- O Concello de Boiro (A Coruña) decidiu ampliar o seu programa de compostaxe doméstica a 25 novas vivendas unifamiliares que dispoñan de terreo (xardín, horta ou terras de cultivo). Así o decidiu tralo éxito alcanzado durante a primeira fase desta iniciativa, na que participaron 30 familias. En ambos casos foi Sogama a encargada de proporcionar ao ente local, e de forma gratuita, os 55 composteiross, con capacidade para 390 litros e fabricados con materiais reciclados e reciclables.

O obxectivo último do Concello é promover e facilitar a autoxestión da materia orgánica e evitar o seu depósito nos contedores verdes convencionais. Esta práctica permitiralle obter importantes beneficios ambientais derivados da reciclaxe dos restos orgánicos en orixe, xa que se pecha o círculo do aproveitamento dos mesmos a través da súa conversión en compost, un abono natural que retorna á terra aportándolle nutrientes e protexendo o solo fronte a posibles pragas e enfermidades.

Así mesmo, e dado que a materia orgánica representa en torno ao 42% da composición media dunha bolsa de lixo tipo, poderíase minorar a cantidade de residuos que deben ser sometidos a tratamento industrial, co conseguinte aforro de custos.

Sogama tamén proporcionou ao ente local manuais didácticos de apoio para que sexan entregados aos veciños participantes a fin de que coñezan con maior precisión a técnica a seguir para obter un compost de alta calidade: desde a propia ubicación do recipiente, que debe estar en contacto coa terra para facilitar a entrada de microorganismos descompoñedores, ata a relación de materiais que deben depositarse no mesmo e o control de parámetros de gran relevancia tales como o osíxeno, a temperatura e a humidade.

Os interesados teñen á súa disposición un sitio web www.compostaconsogama.gal no que atoparán recursos divulgativos sobre a valorización da materia orgánica.

Saúdos Departamento de Comunicación