• Este Pacto busca dar resposta á crecente presión da competencia global e aos altos custos enerxéticos que enfrontan as empresas, asegurando unha transición máis sostible
• A pretensión é romper as cadeas que limitan o progreso das compañías europeas, ofrecendo unha folla de roteiro clara cara a unha economía descarbonizada para 2050

Cerceda, a 27 de febreiro de 2025.- A Comisión Europea vén de lanzar o Pacto Industrial Limpo, un plan deseñado para fortalecer a competitividade e resiliencia da industria en Europa, á vez que acelera a descarbonización e garante o futuro da industria manufactureira no continente.

Este Pacto busca dar resposta á crecente presión da competencia global e aos altos custos enerxéticos que enfrontan as empresas europeas, asegurando unha transición máis sostible e competitiva. Desta forma, busca romper as cadeas que limitan o progreso das compañías, ofrecendo unha folla de roteiro clara cara a unha economía descarbonizada para 2050.

O plan céntrase en dúas áreas crave: industrias de gran consumo de enerxía, sector que enfronta desafíos significativos debido aos altos custes enerxéticos e ás normativas complexas; e tecnoloxías limpas, un sector que se presenta como fundamental para o futuro crecemento da industria, sendo fundamental para a transformación industrial e o fortalecemento da competitividade a nivel global.

Medidas para Impulsar a competitividade

A Comisión deseñou un conxunto de medidas que abarcan todos os sectores industriais co fin de fortalecer a cadea de valor en Europa. É o caso da redución dos custes da enerxía mediante o Plan de Acción para unha Enerxía Alcanzable; o estímulo da demanda de produtos limpos a través da Lei de Aceleración da Descarbonización Industrial; e o financiamento da transición cara a unha enerxía limpa, mobilizando para isto máis de 100.000 M€.

Asegurar o acceso a Materias Primas

O acceso ás materias primas esenciais resulta esencial para garantir a competitividade das industrias da UE. Con tal fin, a Comisión propoñerá medidas como a compra conxunta de materias primas e a creación dun Centro de Materias Primas Fundamentais da UE, co obxectivo de reducir a exposición a provedores pouco fiables.

A través da Lei de Economía Circular, a CE busca acelerar a transición cara a un modelo económico máis circular, asegurando que as materias primas escasas se utilicen de maneira eficiente e promovendo a reutilización e a reciclaxe de recursos.

Colaboracións Internacionais

Co obxectivo de diversificar as cadeas de subministración, a Comisión Europea buscará novos socios internacionais para fortalecer as alianzas comerciais e protexer as industrias europeas contra a competencia desleal. Tamén se prevé a simplificación do Mecanismo de Axuste en Fronteira por Carbono (MAFC).

Dado que a transición da industria cara a un modelo máis sostible require a formación de talento cualificado, o Pacto Industrial Limpo tamén contempla a creación da Unión das Competencias, que investirá nos traballadores e fomentará a capacitación de profesionais en sectores crave relacionados coa descarbonización industrial.

Fonte e imaxe: Comisión Europea