• Desde principios de mes, persoal ao servizo de desta empresa pública está a realizar visitas iniciais aos distintos colexios co fin de recoller datos e proceder á entrega dos medios materiais.
• Aqueles que dispoñen de servizo de comedor e contan con terreo no que aplicar o compost resultante (horta ou xardín), tamén reciben un composteiro para que poidan elaborar o seu propio compost.
• Tralas vacacións de Nadal, comezará un período de sesións formativas presenciais en cada centro, que terá continuidade con visitas de seguimento para comprobar a evolución dos proxectos.
• No seu momento, os colexios deberán presentar unha memoria final a través da aplicación informática do Plan Proxecta.

Cerceda, a 16 de decembro de 2019.-  Os 25 centros de educación primaria adscritos ao programa “Recíclate con Sogama ” 2019-2020, canalizado a través do Plan Proxecta da Xunta de Galicia, xa contan cos medios materiais e didácticos para levar a cabo os seus respectivos proxectos.

Desde principios do presente mes de decembro, persoal ao servizo da Sociedade Galega do Medio Ambiente está efectuando as visitas iniciais a estes colexios co obxectivo de recoller os datos de partida en cada un deles e entregar a illa de reciclaxe, conformada por tres contedores de 120 litros de capacidade (amarelo, azul e verde) a fin de que a comunidade educativa deposite nos mesmos, e de forma segregada, os seus residuos. Ademais, aqueles que dispoñen de servizo de comedor e terreo (horta ou xardín), reciben tamén un composteiro co que teñen a oportunidade de pechar o círculo de reciclaxe da materia orgánica.

Igualmente, enviouse a todos eles, en soporte dixital, diversos recursos divulgativos de apoio. É o caso de presentacións, vídeos, xogos e unidades didácticas destinadas especificamente ao profesorado a fin de que este conte cos coñecementos necesarios para instruír ao alumnado en torno ao principio dos tres erres (redución, reutilización e reciclaxe), esencial na xestión sostible dos residuos urbanos.

Tralas vacacións de Nadal, comezará un período de formación presencial. Para isto, educadores especializados desprazaranse a cada colexio para impartir sesións formativas e propiciar que os pequenos amplíen a súa bagaxe na materia e consulten todas as súas dúbidas.

Acto seguido realizaranse visitas de seguimento, tendo lugar a última cara ao mes de maio a fin de comprobar a evolución dos proxectos, así como a calidade do material depositado nos distintos contedores de recollida selectiva, un parámetro que se terá en conta na avaliación final.

No seu momento, os centros deberán presentar, a través da aplicación informática do Plan Proxecta, unha memoria final que será cualificada conxuntamente por representantes da Consellería de Educación e Sogama.

CENTROS SELECCIONADOS

Provincia da Coruña (4):

• CEIP Milladoiro, de Malpica de Bergantiños.
• CEIP Plurilingüe Unión Mugardesa, de Mugardos.
• CEIP de Ponzos, de Ferrol.
• CEIP Manuel Fraga Iribarne, de Agarimo.

Provincia de Pontevedra (13):

• CEIP Santo André de Xeve, de Pontevedra.
• CEIP Plurilingüe Paraixal, de Vigo
• CEIP Pérez Viondi, de A Estrada
• CEIP Plurilingüe Florida, de Sanxenxo
• CEIP de Fonte Escura, de Vigo
• CEIP Plurilingüe Pintor Laxeiro, de Vigo
• CEIP Plurilingüe Souto-Donas, de Gondomar
• CEIP Plurilingüe Javier Sensat, de Vigo
• CEP Santa Mariña, de Redondela
• CEIP Plurilingüe de Guillarei, de Tui
• CEIP San Tomé, de Cambados
• CEIP Virxe do Rocío, de Vigo
• CEIP Plurilingüe dá Carrasqueira, de Vigo

Provincia de Lugo (2):

• CEIP de Currelos, de O Saviñao
• CEIP Otero Pedrayo, de Rábade

Provincia de Ourense (6):

• CEIP Manuel Sueiro, de Ourense
• CEIP Bibei, de Viana do Bolo
• CEIP Plurilingüe Ribadavia, de Ribadavia
• CEIP Saco e Arce, de Toén
• CEIP Plurilingüe María Inmaculada, de Verín
• CEIP Virxe da Pena da Sela, de O Irixo

Saúdos, Departamento de Comunicación