• Adoptou onte a súa posición ao redor da proposta de revisión do Directiva marco, contemplando obxectivos máis ambiciosos de redución do desperdicio alimentario e novas normas sobre responsabilidade ampliada do produtor de téxtiles, pezas de vestir e calzado
• Cada europeo xera anualmente 131 kg de residuos alimentarios e 12 kg de téxtiles

Cerceda, a 15 de febreiro de 2024.- Os eurodeputados da Comisión de Medio Ambiente adoptaron onte a súa posición ao redor da proposta de revisión da Directiva marco sobre residuos, contemplando obxectivos máis ambiciosos de redución do desperdicio alimentario e novas normas sobre responsabilidade ampliada do produtor de téxtiles, pezas de vestir e calzado.

No primeiro caso, os eurodeputados queren aumentar os obxectivos vinculantes de redución do desperdicio de alimentos propostos pola Comisión ata alomenos o 20% no procesamento e a fabricación de alimentos (en lugar do 10%) e ata o 40% per cápita no comercio minorista, os restaurantes, os servizos alimentarios e os fogares (en lugar do 30%), en comparación coa media anual xerada entre 2020 e 2022. Os países da UE terían que garantir que estes obxectivos se alcancen a nivel nacional antes do 31 de decembro de 2030.

Tamén queren que a Comisión avalíe a posibilidade e presente propostas lexislativas apropiadas para introducir obxectivos máis elevados para 2035 (alomenos o 30% e o 50% respectivamente).

No segundo caso, as novas normas establecerían sistemas de responsabilidade ampliada do produtor (REP), a través dos cales os operadores económicos que comercializan téxtiles no mercado da UE cubrirían os custos da súa recollida selectiva, clasificación e reciclado. Os Estados membros terían que establecer estes sistemas 18 meses despois da entrada en vigor da directiva (fronte aos 30 meses propostos pola Comisión). Paralelamente, os países da UE terían que garantir, antes do 1 de xaneiro de 2025, a recollida selectiva de téxtiles para a súa reutilización, a súa preparación para a súa reutilización e a súa reciclaxe.

Estas normas abarcarían produtos téxtiles como pezas de vestir e accesorios, mantas, roupa de cama, cortinas, sombreiros, calzado, colchóns e alfombras, incluídos produtos que conteñan materiais relacionados cos téxtiles, como coiro, coiro rexenerado, caucho ou plástico.

Está previsto que o pleno vote a súa posición na sesión plenaria do próximo mes de marzo.

Contexto

Cada ano xéranse na UE 60 millóns de toneladas de residuos alimentarios (131 kg por persoa) e 12,6 millóns de toneladas de residuos téxtiles. Só a roupa e o calzado xeran 5,2 millóns de toneladas de residuos, o que equivale a 12 kg de residuos por persoa ao ano. Calcúlase que menos do 1% de todos os téxtiles do mundo se reciclan en novos produtos.

Fonte: Parlamento Europeo

Imaxe: Pexels