• O novo Regulamento tamén contén novas medidas para poñer fin á práctica despilfarradora e prexudicial para o medio ambiente de destruír artigos de consumo non vendidos

Cerceda, a 15 de decembro de 2023.- A Comisión acolle con satisfacción o acordo provisional alcanzado recentemente entre o Parlamento Europeo e o Consello relativo ao Regulamento sobre deseño ecolóxico para produtos sostibles, xa que contribuirá a que estes duren máis tempo, a que utilicen a enerxía e os recursos de maneira máis eficiente, a que sexan máis fáciles de reparar e reciclar, a que conteñan menos substancias perigosas e inclúan máis contido reciclado. Tamén mellorará a igualdade de condicións para os produtos sostibles no mercado interior da UE e reforzará a competitividade mundial das empresas que os ofrecen.

A nova lei basearase na actual Directiva sobre deseño ecolóxico, que impulsou con éxito a mellora da eficiencia enerxética dos produtos na UE durante case 20 anos. Permitirá establecer progresivamente requisitos de rendemento e información para os produtos crave introducidos no mercado da UE.

A Comisión adoptará e actualizará periodicamente unha lista de produtos identificados sobre a base dunha análise exhaustiva e de criterios relacionados, en particular, cos obxectivos da UE en materia de clima, medio ambiente e eficiencia enerxética.  Darase prioridade aos produtos de gran impacto, incluídos os téxtiles (especialmente pezas de vestir e calzado), os mobles (incluídos os colchóns), o ferro e o aceiro, o aluminio, os pneumáticos, as pinturas, os lubricantes e os produtos químicos, así coma os relacionados coa enerxía, as TIC e outros de carácter electrónico.

Os novos requisitos de deseño ecolóxico irán máis aló da eficiencia enerxética e terán por obxecto impulsar a circularidade dos produtos.

Así mesmo, o novo Regulamento tamén contén novas medidas orientadas a poñer fin á práctica despilfarradora e prexudicial para o medio ambiente de destruír produtos de consumo non vendidos, polo que as empresas terán que adoptar medidas para evitar esta práctica. Neste marco, os colexisladores introduciron unha prohibición directa da destrución de produtos téxtiles e calzado non vendidos, con excepcións para as pequenas empresas e un período transitorio para as medianas.

Mellor información para os consumidores

Facilitarase máis información sobre as características de sostibilidade dos produtos, en particular a través dun «pasaporte dixital de produtos», que axudará aos consumidores e empresas a elixir produtos máis sostibles, e ás autoridades a mellorar o cumprimento dos requisitos legais.

Tamén podería facilitarse información adicional sobre o produto a través de etiquetas similares á etiqueta enerxética da UE, actualmente en vigor para moitos relacionados coa enerxía.

Fonte: Comisión Europea

Imagen: Pexels