• Ademais de supoñer un aforro, con esta medida contribuirase á consecución dos obxectivos do Pacto Verde Europeo mediante a redución de residuos
• A pretensión é que sexa máis fácil e rendible reparar que substituír, coa particularidade de que unha maior demanda traducirase nun impulso para o sector da reparación, á vez que incentivará aos produtores e vendedores a desenvolver modelos comerciais máis sostibles

Cerceda, a 17 de abril de 2023.- A Comisión adoptou unha nova proposta sobre normas comúns para fomentar a reparación de bens, o que suporá un aforro para os consumidores e apoiará a consecución dos obxectivos do Pacto Verde Europeo mediante a redución de residuos.

Durante as últimas décadas, veuse priorizando a substitución sobre a reparación cando os produtos se estragan e os consumidores non reciben suficientes incentivos para reparalos no momento en que vence a garantía legal. A proposta fará que sexa máis fácil e rendible reparar en lugar de substituír bens, coa vantaxe de que unha maior demanda traducirase nun impulso para o sector da reparación, á vez que incentivará aos produtores e vendedores para que desenvolvan modelos comerciais máis sostibles.

“DEREITO A REPARAR”

A proposta introduce un novo 'dereito a reparar' para os consumidores, tanto dentro como fóra da garantía legal. Dentro da garantía legal, os vendedores estarán obrigados a ofrecer a reparación, excepto cando sexa máis cara que a substitución. E máis aló da garantía legal, establécese un novo conxunto de dereitos e ferramentas que estarán dispoñibles para os consumidores co obxectivo de facer da 'reparación' unha opción fácil e accesible:

• Dereito dos consumidores a reclamar a reparación para produtos que son tecnicamente reparables segundo a lexislación da UE, como unha lavadora ou un televisor. Isto garantirá que sempre teñan a alguén a quen recorrer cando opten por reparar os seus produtos, e alentará aos produtores a desenvolver modelos comerciais máis sostibles.
• Obrigación dos produtores de informar os consumidores sobre os produtos que están obrigados a reparar eles mesmos.
• Unha plataforma de reparación de emparellamento en liña para conectar aos consumidores con reparadores e vendedores de produtos reacondicionados na súa área. A plataforma permitirá procuras por localización e estándares de calidade, axudando aos consumidores a atopar ofertas atractivas e aumentando a visibilidade para os reparadores.
• Un formulario europeo de información sobre reparacións que os consumidores poderán solicitar a calquera reparador, achegando transparencia ás condicións e o prezo das reparacións, e facilitando aos consumidores a comparación de ofertas.
• Desenvolvemento dun estándar de calidade europeo para os servizos de reparación co fin de axudar aos consumidores a identificar aos reparadores que se comprometen cunha maior calidade.

A proposta da Comisión debe ser adoptada polo Parlamento Europeo e o Consello.

Fonte: Comisión Europea

Imaxe: Pixabay