• As tendas secondhand de Humana venderon máis de catro millóns de artigos en 2020, malia as dificultades derivadas da pandemia.
• Pola súa banda, o número de clientes incrementouse nun 20%.
• A reutilización e a reciclaxe son as alternativas perfectas para impulsar o consumo responsable e a moda sostible.

Cerceda, a 19 de maio de 2021.- Humana Fundación Pueblo para Pueblo, organización que desde 1987 promove a protección do medio ambiente a través da reutilización de téxtil e leva a cabo programas de cooperación ao desenvolvemento en África, América Latina e Asia, así como de apoio local e agricultura urbana en España, destaca que a compra de prendas usadas nas súas tendas secondhand aumentou un 38% por punto de venda nos últimos anos. En paralelo, o número de clientes incrementouse nun 20%. Esta tendencia confirma que o auxe da segunda man é unha realidade imparable, non en van impulsa un modelo de consumo responsable, favorece a prevención de residuos e a sostibilidade do sector téxtil.

Con motivo do Día Mundial da Reciclaxe, celebrado o pasado luns, 17 de maio, Humana lembrou que comprar moda secondhand evita o consumo anual de millóns de prendas novas. Segundo un informe da Fundación, seis de cada dez usuarios recoñecen que, ao comprar unha prenda nos establecementos da entidade, non necesitan adquirila noutro punto de venda convencional. “Este índice de substitución confirma o valor ambiental da reutilización, porque non hai prenda máis sostible que a xa fabricada”, asegura Elisabeth Molnar, directora xeral da Fundación.

Humana conta con 45 tendas en catro cidades: Madrid (23), Barcelona (20), Sevilla (1) e Selecta (1), que venden prendas de segunda man seleccionadas nas instalacións de Leganés (Comunidade de Madrid) e l’Ametlla do Vallès (Barcelona).

BALANCE DOS ÚLTIMOS 5 ANOS

A tendencia á alza da moda de segunda man é evidente nos últimos anos. En 2015, Humana dispoñía de 40 tendas que venderon 2,8 millóns de prendas; en 2019, o número de artigos adquiridos ascendeu a 5,2 millóns en 53 establecementos. Este fenómeno viuse acompañado polo incremento do número de clientes atraídos pola roupa reutilizada: 1,2 millóns de clientes fai seis anos por 1,9 millóns antes da pandemia.

Humana recolleu 16.270 toneladas de téxtil usado en España durante 2020 para darlles unha segunda vida a través da súa reutilización ou reciclado. É unha cifra menor que a do ano precedente (17.573 toneladas), un exercicio extremadamente complexo debido á pandemia.

As toneladas recuperadas equivalen a 48 millóns de prendas de roupa cuxa xestión implica un dobre beneficio: ambiental, porque reduce a xeración de residuos e contribúe á loita contra o cambio climático; e social, porque crea postos de traballo inclusivos, estables e de calidade.

Doutra banda, os recursos obtidos destínanse a proxectos sociais: tras máis de tres décadas de actividade, tres millóns de persoas víronse involucradas nos programas de desenvolvemento nos países do Sur da man de contrapartes ou socios locais. A Fundación destinou máis de 32 millóns de euros para a formación de profesores de primaria, o impulso da agricultura sostible ou a loita contra o VIH/SIDA, entre outras accións.

DESTINO DA ROUPA USADA

As prendas depositadas nos contedores de Humana teñen dous destinos: a meirande parte trátase nas plantas de preparación para a reutilización da Fundación (en Madrid e Barcelona) e o resto véndese a empresas de reutilización e reciclado. O destino das prendas tratadas é:

• O 54% destínase a reutilización: o 14% a través das tendas secondhand de Humana en España e o 40% expórtase, principalmente a África, para ser vendido a prezos baixos e así xerar recursos para a cooperación ao desenvolvemento.
• O 37,5% atópase nun estado que non permite a súa reutilización, polo que se vende a empresas de reciclaxe téxtil para que elaboren outros produtos (mantas, illantes ou trapos para a industria de automoción).
• O 1,5% son residuos impropios (plástico, cartón, outros) que se pon en mans dos correspondentes xestores autorizados.
• O 7% non se pode reutilizar nin reciclar nin valorizar enerxeticamente e envíase a un centro de tratamento de residuos para a súa disposición final.

Toda a información en https://www.humana-spain.org/

Fonte e imaxe: Humana