• Recolleu case 11 quilos de RAEE por habitante, sendo o primeiro SCRAP en superar, por oitavo ano consecutivo, as 100.000 toneladas recuperadas para a súa reciclaxe

Cerceda, a 3 de abril de 2025.- A Fundación Ecolec xestionou durante 2024 un total de 108.549 toneladas de residuos de aparellos eléctricos e electrónicos (RAEE), recollendo 10,97 quilos por habitante. Desta forma, superou as 100.000 toneladas anuais de RAEE xestionadas durante oito exercicios consecutivos, sendo, ademais, o primeiro e único Sistema Colectivo de Responsabilidade Ampliada do Produtor (SCRAP) en acadalo.

Segundo Nacións Unidas, a xeración de residuos electrónicos no mundo aumenta cinco veces máis rápido que a súa reciclaxe. En 2022 bateuse un récord de 62 millóns de toneladas de RAEE, cifra que encherían un millón e medio de camións de 40 toneladas, segundo o informe The Global E-Waste Monitor 2024. A xeración destes residuos crece cada ano en 2,6 millóns de toneladas, polo que en 2030 chegará ata os 82 millóns de toneladas.

“Hai moitas evidencias que demostra que a reciclaxe dos nosos RAEE é esencial. Por exemplo, un frigorífico mal reciclado emite á atmosfera gases de efecto invernadoiro equivalentes ás emisións dun coche en 15.000 quilómetros”, recalcou Luis Moreno, Director Xeral da Fundación Ecolec. Ademais, quixo facer especial fincapé en que “as consecuencias de non reciclar correctamente os nosos aparellos electrónicos cando deixan de funcionar agrávanse naqueles puntos do Planeta onde a extracción de materias primas para fabricar estes produtos produce graves impactos sociais”.

Todos os dispositivos eléctricos que se usan no día a día poden ter unha segunda vida se se reciclan correctamente. Cada usuario convértese no actor principal dun proceso no que se pode dar un final apropiado que, por unha banda, ofreza a posibilidade da súa reutilización e, por outra, axude a unha desmontaxe e unha descontaminación sostible, responsable e respectuosa co medio ambiente.

Fonte e imaxe: Ecolec