• Participaron na mesma preto de 50 alumnos/as do ciclo medio e superior do ámbito agrario e administrativo, con distinta inquietudes e intereses

• A través dun percorrido virtual, puideron coñecer todos os recunchos das distintas infraestruturas polas que discorre o residuo para ser tratado e transformado nun recurso: ben a través da súa reciclaxe ou ben mediante a súa valorización enerxética, no caso da parte non reciclable

Cerceda, a 3 de abril de 2025.- Preto de 50 estudantes de Formación Profesional do IES de Arzúa (A Coruña), concretamente do ciclo medio e superior do ámbito agrario e administrativo, desprazáronse esta mañá ao Complexo Medioambiental de Sogama en Cerceda para obter información sobre a súa operativa industrial e disipar dúbidas sobre o modelo de economía circular ao que a sociedade no seu conxunto debe avanzar.

As consultas realizadas versaron sobre distintas temáticas: desde a relación de residuos que deben, e non deben, depositarse nos distintos contedores de recollida selectiva, especialmente no amarelo de envases, ata os beneficios, tanto ambientais coma económicos e sociais, que trae consigo a xestión sostible dos residuos.

Ademais das explicacións proporcionadas por técnicos da empresa, o grupo tivo a oportunidade de facer un percorrido virtual polas instalacións que conforman o Complexo cercedense e que integran a secuencia de tratamento que reciben os residuos desde que son recibidos e clasificados por tipos de material para remitir aos centros recicladores, ata que a parte non reciclable, previo acondicionamento da mesma nun combustible derivado de residuos (CDR), é valorizada enerxeticamente, producindo a partir da mesma a electricidade suficiente coa que abastecer ao 12% dos fogares galegos.

Equipados con lentes inmersivas 360º, desprazáronse polas distintas plantas para coñecer o seu equipamento e operativa, comprobando como todas elas integran o ciclo de xestión polo que discorren preto 800.000 toneladas de residuos anuais producidos polos 295 concellos adscritos a Sogama.

Tal e como se lles avanzou, o obxectivo desta empresa pública é poñer en valor os refugallos, ben mediante a súa conversión en novos produtos (no caso dos reciclables) ou ben enerxía eléctrica (os non reciclables), minimizando o uso de vertedoiro, que queda relegado a último lugar e só para aqueles refugallos que, dadas as súas características, non poden ser reciclados nin valorizados enerxeticamente.

Tamén houbo tempo para o xogo coas máquinas Arcade, que lles serviron para competir en coñecementos, habilidades e axilidade.

Saúdos, Departamento de Comunicación