• Os monitores desta empresa pública impartiron unha sesión no Colexio Daniel Castelao, que se completou cunha análise da composición de determinados residuos a fin de que o alumnado aprendese a identificar o contedor de destino

Cerceda, a 27 de xaneiro de 2025.- Estudantes de FP Básica que cursan os seus estudos no Colexio Daniel Castelao de Vigo, recibiron, a cargo de técnicos de Sogama, unha sesión formativa centrada na reciclaxe e os seus beneficios ambientais e económicos.

Con todo, e antes de entrar en materia, os monitores abundaron na problemática que, a día de hoxe, supón a elevada produción de residuos, que facer para reducilos, como alongar a vida útil dos produtos a través da reutilización e como segregar os refugallos en orixe para que poidan ser reciclados, previo depósito dos mesmos nos diferentes contedores de recollida selectiva habilitados nas vías públicas.

Así mesmo, explicóuselles a operativa de Sogama, a súa rede de infraestruturas, cuxo núcleo se sitúa no Complexo Medioambiental de Cerceda (A Coruña), onde se clasifican por tipoloxías os materiais recollidos a través do contedor amarelo (envases de plástico, latas e briks) para a súa remisión aos centros de reciclaxe e recupérase a parte reciclable contida na fracción resto (contedor xenérico), acondicionando, coa non reciclable un combustible CDR que é valorizado na planta termoeléctrica para a xeración de enerxía eléctrica renovable. Complementan a actividade deste Complexo un total de 37 plantas de transferencia distribuídas estratexicamente por toda Galicia e 4 plantas de biorresiduos.

Dada a importancia crave que a colaboración cidadá ten na consecución de maiores índices de reciclaxe, durante a xornada analizouse a composición de determinados refugallos para que os estudantes aprendesen a identificar o contedor de destino, sendo este un paso crucial para que a calidade dos materiais que chegan aos centros recicladores sexa a axeitada

Saúdos, Departamento de Comunicación