• Aumentar a recollida, incentivar aos consumidores e vincular a reciclaxe dos residuos electrónicos e o ecodeseño, foron algunhas das conclusións extraídas durante o evento

Cerceda, a 17 de xuño de 2024.- A principios deste mes de xuño, EuRIC celebrou unha xornada sobre reciclaxe de residuos electrónicos “Plug into sustainability: E-waste recycling”, na que reuniu a uns 1.000 participantes, así como a diversas partes interesadas, para abordar os retos que supón a correcta xestión dos RAEE e trazar o camiño a seguir para aumentar a recuperación de materiais contidos nos mesmos.

O evento enviou unha mensaxe contundente e é que a reciclaxe de residuos electrónicos e o ecodeseño deben ir da man. Para lograr a circularidade dos RAEE, necesítanse incentivos orientados aos recicladores, capacitación dos consumidores e un marco xurídico con obxectivos e disposicións axeitadas que garantan a igualdade de condicións e impulsen a demanda de materiais reciclados na UE.

Intervencións e posicionamentos

No primeiro bloque da xornada abordouse o papel que deben desempeñar os RAEE nunha economía circular. Para isto contouse coa participación de Fanny Rateau (ECOS), Pascal Leroy (WEEE Forum), Korrina Hegarty (APPLiA), Ulf Arnesson (Stena Metalls), John Wante (Ministerio Federal de Medio Ambiente belga) e Annett Linemann (H.B Fuller/FEICA). Todos eles coincidiron na necesidade de mellorar e aumentar a recollida, en evitar as exportacións ilegais de residuos electrónicos, en mellorar o diálogo entre recicladores e fabricantes, en incentivar aos consumidores, en facilitar a desmontaxe dos produtos e alongar a súa vida útil, e en promulgar unha lexislación tecnoloxicamente neutra.

Pola súa banda, Christian Winkler (Remondis Electrorecyclinp), sinalou que “deberiamos ser considerados produtores de materias primas recicladas, non só recicladores», dado o material de alta calidade que a industria da reciclaxe é capaz de producir grazas aos continuos investimentos.

O segundo bloque, centrado no peche do ciclo na cadea de valor dos plásticos electrónicos, nutriuse coas intervencións de Laura Baillargeon (Comisión Europea, DG Grow), Pablo León (Sosten plas), Federico Magalini (Dss+) e Judit Guerra-Falcon (Plastics Europe), destacando a necesidade dunha metodoloxía concreta para os obxectivos de contido reciclado, de avaliacións exhaustivas antes de tomar decisións, de igualdade de condicións cos axentes estranxeiros, de abordar os problemas de exportación que formulan as novas normas sobre traslado de residuos e de crear cadeas de subministración de plásticos resistentes.

Ao respecto, a responsable da DG Grow expuxo os retos aos que se enfronta o plástico reciclado en Europa, como son a competencia cos plásticos virxes, o abaratamento dos plásticos reciclados importados e a competitividade da industria europea da reciclaxe de plásticos. Tamén fixo un chamamento á realidade para garantir que as novas medidas da UE sexan viables e rendibles para os recicladores.

Fonte e imaxe: Retema