• O programa  Ecovoz regresa esta tarde á radio para dar continuidade á tarefa de educación ambiental que vén levando a cargo desde fai 20 anos.
• Polos seus micrófonos pasaron xeracións de nenos e nenas que aportaron o seu gran de area na creación de conciencia cidadá na protección da contorna.
• Entrevistas a expertos na materia e a personaxes  populares, consellos, boas prácticas e ata un espazo de ecomúsica  compleméntanse co tradicional concurso escolar “O Ecopreguntoiro”
• A edición deste ano chegará ao seu fin no mes de xuño, coincidindo co último tramo do curso académico, e farao cunha gran festa que dará o pistoletazo  de saída á próxima tempada de verán do Parque Acuático de Cerceda.

Cerceda, a 1 de febreiro de 2019.- Hoxe comeza unha nova edición do histórico programa “Ecovoz”, un espazo de radio centrado na educación ambiental de pequenos e maiores, e no que a xestión sostible dos residuos urbanos ocupa un lugar protagonista.

Emitido desde fai dúas décadas por Radio Voz Galicia, polos seus micrófonos pasaron moitas xeracións de nenos e nenas que, coas súas ideas, esforzo, traballo e iniciativas, quixeron aportar o seu gran de area na creación de conciencia ambiental entre a poboación.

As súas achegas compleméntanse ano tras ano coa bagaxe e amplos coñecementos de distintos expertos e profesionais do sector que falaron  de novidades e tendencias no ámbito dos residuos, pero tamén no campo das enerxías renovables, a natureza, a auga, a biodiversidade, a mobilidade sostible, a innovación tecnolóxica ambiental e a ecoloxía, entre outras temáticas. Todos eles forman parte do acervo dun programa que  evolucionou co tempo, adaptando o seu formato, contidos e áreas de interese, en sintonía coas preocupacións ambientais da cidadanía.

Non obstante, o seu tradicional concurso escolar “O Ecopreguntoiro” perpetuouse na súa versión orixinal pola excelente acollida que terá e ten entre a comunidade educativa, servindo como elemento formativo, pero tamén como oportunidade para a diversión, a ilusión e a competición sa e saudable.

Un total de 16 centros escolares de educación primaria compiten en coñecementos  ambientais, chegando á final os dous que consigan  superar as distintas eliminatorias. Nervios, presión e moita emoción constitúen os elementos que reinan semana tras semana durante o certame. Todos aspiran a ser os mellores, pero deben demostrar que saben máis que os seus rivais na área medioambiental.

O programa, de carácter semanal e cunha hora de duración durante as tardes dos venres, compleméntase con outras  seccións tales como a Ecoentrevista, na que participa un experto no medio ambiente; os Ecoconsellos, onde se proporcionan recomendacións e boas prácticas para levar unha vida saudable e respectuosa coa contorna; e a Ecovisita, onde  os escolares dan a coñecer  os lugares máis emblemáticos dos municipios aos que pertencen desde unha dimensión ecolóxica, paisaxística, turística e de recreo.

Este ano tamén se contemplará o premio Ecovaledor, a través do cal recoñecerase a unha das persoas que participen  no mesmo e que destaque polo valor dalgunha  iniciativa ou proxecto que lidere ou do que forme parte; un microespazo de Ecomúsica, no que se deleitará aos oíntes cunha peza musical que teña por obxecto  o coidado  da natureza; e unha sección Ecovip, que inclúe breves entrevistas a personaxes  populares para que conten como separan os seus residuos no fogar, con que  dificultades se atopan, como organizan a recollida selectiva e as razóns polas cales colaboran no sistema.

E todo isto aderezado coa regueifeira Lupe, que trasladará cada semana consellos e boas prácticas en verso e cantados.

O programa chegará a o seu fin no mes de xuño, coincidindo co último tramo do curso académico, e farao cunha gran festa que dará o pistoletazo  de saída á próxima tempada de verán do Parque Acuático de Cerceda.

Saúdos, Departamento de Comunicación