• Aglutina información sobre medición, redución, políticas, alianzas e exemplos de modelos exitosos en todo o mundo.
• A redución da perda e o desperdicio de alimentos pode reportar numerosos beneficios: maior cantidade de alimentos dispoñibles para os máis vulnerables, menores emisións de GEI, menor presión sobre os recursos hídricos e de terras, e incremento da produtividade e o crecemento económico. 
• Os alimentos pérdense cando se estropean ou se derraman antes de chegar ao produto final ou a etapa de venda polo miúdo. E desperdícianse cando os consumidores os descartan ou se eliminan na venda polo miúdo debido a que non cumpren normas de calidade estritas.

Cerceda, a 4 de setembro de 2020.- A Organización das Nacións Unidas para a Alimentación e a Agricultura (FAO) presentou recentemente unha plataforma para axudar á comunidade internacional a acelerar a aplicación de medidas orientadas a reducir a perda e o desperdicio alimentario.

A plataforma  aglutina información sobre medición, redución, políticas, alianzas e exemplos de modelos exitosos en todo o mundo.  

O xefe da FAO instou aos sectores público e privado e ás persoas a promover, aproveitar e ampliar as políticas, a innovación e as tecnoloxías para reducir a perda e o desperdicio de alimentos, así como a intensificar os esforzos nun momento no que o COVID-19 puxo de manifesto a vulnerabilidade dos sistemas alimentarios e a necesidade de facelos máis resistentes.

Esta ferramenta proporciona acceso a todos os recursos da FAO na materia: a maior recompilación de datos sobre a cantidade de alimentos que se perden e desperdician, e onde; un foro de debate; exemplos de iniciativas exitosas; cursos de formación online; orientacións sobre políticas como consecuencia da pandemia da COVID19; e ideas sobre o que calquera persoa pode facer para reducir o desperdicio de comida.

DIFERENZAS ENTRE PERDA E DESPERDICIO DE ALIMENTOS

Os alimentos pérdense cando se estropean ou se derraman antes de chegar ao produto final ou a etapa de venda polo miúdo. Por exemplo, os produtos lácteos, a carne e o peixe poden estropearse durante o transporte debido a servizos de transporte refrixerado e de almacenamento en frío inadecuados.

A FAO estima que o 14 % dos alimentos pérdense deste xeito, representando o equivalente a 1,5 gigatoneladas de CO2.

As perdas son maiores nos países en desenvolvemento (14 %), mentres que nos desenvolvidos representan o 5,8 %. Afectan sobre todo a raíces, tubérculos e cultivos oleaxinosos (25 %), froitas e hortalizas (22 %) e produtos cárnicos e de orixe animal (12 %).

Os alimentos desperdícianse cando os consumidores os descartan ou se eliminan na venda polo miúdo debido a que non cumpren normas de calidade estritas, ou con bastante frecuencia debido a que non se comprende a data indicada no produto. A comida que non chega a consumirse representa un derroche de recursos: man de obra, terra, auga, chan e sementes,aumentando as emisións de GEI.

BENEFICIOS DA REDUCIÓN E DESPERDICIO ALIMENTARIO

A redución da perda e o desperdicio de alimentos pode reportar numerosos beneficios: unha maior cantidade de alimentos dispoñibles para os máis vulnerables, unha redución das emisións de gases de efecto invernadoiro (GEI), unha diminución da presión sobre os recursos hídricos e de terras, así como un incremento da produtividade e o crecemento económico. 

Para conseguir os devanditos beneficios, ínstase a aplicar a innovación, tanto tecnolóxica como operacional. É o caso de solucións tecnolóxicas para a xestión postcolleita, novas formas de traballar conxuntamente e un envasado de alimentos máis axeitado, así como a relaxación dos regulamentos e as normas sobre os requisitos estéticos para as froitas e as hortalizas; hábitos de consumo sostible; políticas gobernamentais tales como directrices para redistribuir o excedente de alimentos inocuos a persoas necesitadas a través de bancos de alimentos; e o establecemento de alianzas, incluso fóra do sector alimentario, por exemplo cos actores no ámbito do clima.

A FAO considera que intervencións como informar ao público, investir na infraestrutura das cadeas de subministración, capacitar aos agricultores nas mellores prácticas e reformar as subvencións alimentarias que provocan de xeito non intencionado un aumento das perdas e o desperdicio alimentario, resultan máis convenientes que outras medidas.

Fonte: FAO

Imaxe: Pixabay