• Lanza a segunda edición do proxecto ‘JOBS 2030 – Futuro do Traballo’ co obxectivo de crear un espazo de diálogo, coñecemento e tendencias empresariais sobre as implicacións, retos e oportunidades que a transición verde vai ter no futuro do traballo
• A OIT e a CE estiman, a nivel mundial, a creación de ata 60 millóns de novos empregos ligados á transición verde ata 2050

Cerceda, a 5 de maio de 2022.-  Forética, a organización empresarial referente en materia de sustentabilidade en España, lanza a segunda edición do proxecto ‘JOBS 2030 – Futuro do Traballo’, co obxectivo de crear un espazo de diálogo, coñecemento e tendencias empresariais sobre as implicacións, retos e oportunidades que a transición verde vai ter no futuro do traballo, e que mecanismos é necesario acelerar para promover unha transición xusta.

Os empregos verdes ou ‘Green Jobs’ forman parte da resposta empresarial a retos globais coma o cambio climático, a protección ambiental, o desenvolvemento económico ou a inclusión, á vez que ocupan un espazo importante na reconstrución social e económica no escenario post- COVID 19.

Segundo datos da OCDE, a zona euro pode tardar ata 2,5 anos en alcanzar niveis de emprego previos á pandemia de decembro de 2019. Unha importante parte desta recuperación vai ir ligada á transición verde. A Organización Internacional do Traballo (OIT) e a Comisión Europea, estiman que estes datos poden representar ata 60 millóns de novos empregos ata 2050 a nivel mundial.

O proxecto, apoiado institucionalmente polo Ministerio de Traballo e Economía Social, conta tamén, en calidade de  partners, aos gobernos autonómicos de Aragón, Castela e León, Estremadura, Galicia, A Rioxa, Comunidade de Madrid, Rexión de Murcia e Navarra, xunto ao Cabildo de Tenerife.

No marco de ‘JOBS 2030 – Futuro do Traballo’, Forética porá en marcha un observatorio español de emprego verde e transición xusta no que se analizará a situación nas empresas españolas, propoñeranse vías de avance e unha folla de roteiro cos principais elementos de acción, ademais de poñer en valor boas prácticas de organizacións líderes.

Na primeira edición do proxecto,  Forética seleccionou un total de 40 iniciativas empresariais que dan resposta aos retos que expón o futuro do traballo, en tres dimensións estratéxicas: transformación tecnolóxica centrada nas persoas; promoción e desenvolvemento de talento, habilidades e coñecementos; e diversidade e inclusión no lugar de traballo.

Fonte: Compromiso  RSE

Imaxe:  Pixabay