• Así o explicou a directora xeral de Sogama, Mirta Sueiro, na Cadea Ser Coruña, onde deu a coñecer os pormenores técnicos da instalación e as súas funcionalidades

Cerceda, a 14 de febreiro de 2025.- En declaracións á Cadea Ser Coruña, a directora xeral de Sogama, Mirta Sueiro, explicou os pormenores técnicos da actividade da futura planta para a clasificación de residuos téxtiles, que se situará no complexo medioambiental desta empresa pública en Cerceda (A Coruña).

Con capacidade para procesar inicialmente 3.000 toneladas/ano, ampliable ata 24.000 toneladas, á construción e xestión desta instalación destinarase un investimento próximo aos 25 millóns de euros, prevendo que entre en funcionamento no segundo trimestre de 2026.

Sueiro incidiu en que se trata dun proxecto “tractor e integrador”, que dá resposta ás necesidades de distintos colectivos, isto é, á sociedade no seu conxunto, xa que a día de hoxe o 90% dos residuos téxtiles acaban en vertedoiro; aos concellos, toda vez que, desde o pasado 1 de xaneiro, quedan obrigados por lei a instaurar a recollida selectiva deste material; e ás empresas do sector téxtil, que tamén por mandato legal deben incorporar aos seus produtos unha porcentaxe de fibra reciclada.

Proceso

Os residuos téxtiles que se reciban na futura planta de Sogama, tanto os procedentes de entidades de economía social coma dos concellos, serán sometidos a unha primeira fase de preclasificación, onde se separa todo aquilo que non sexa téxtil, así como as pezas que estean en boas condicións para un segundo uso.

Acto seguido, os téxtiles sométense a un proceso de clasificación automática, no que entra en xogo a intelixencia artificial, e, nunha segunda fase, sepáranse elementos impropios e accesorios tales como botóns, cremalleiras etc.

O material resultante prénsase e envíase aos centros recicladores para transformarse en fibra téxtil reciclada, aínda que tamén pode converterse en produtos illantes.

Aquela parte que, dadas as súas características, non pode ser reutilizada nin reciclada, Sogama valorízaa enerxeticamente para producir electricidade, evitando desta forma que acabe enterrada en vertedoiro, a peor das opcións debido ao seu negativo impacto ambiental e sobre a saúde.

A planta xerará, nunha primeira fase, entre 16 e 30 empregos directos que se cubrirán, con carácter preferente, por persoas con discapacidade e/ou en risco de exclusión social.

Saúdos, Departamento de Comunicación