• Realizáronse, entre o 14 e o 17 de xaneiro, nos concellos de Pontedeva, Quintela de Leirado, Verea, Celanova, Gomesende, Ramirás, Cartelle e A Merca, entre os que se repartiron 200 composteiros subministrados pola empresa pública
• O principal obxectivo das sesións formativas era instruír aos participantes no proceso a seguir para lograr un abono natural de alta calidade que cumpra con todos os requisitos normativos para ser aplicado na agricultura e xardinería con garantías
• A autoxestión da materia orgánica trae consigo un importante aforro de custos, tanto ambientais como económicos

Cerceda, a 24 de xaneiro de 2025.- Durante a semana do 14 ao 17 de xaneiro, técnicos de Sogama impartiron cursos de formación sobre compostaxe doméstica nos oito concellos que conforman a Mancomunidade de Celanova (Ourense), á que dotou no seu momento con 200 composteiros.

A gran acollida das sesións por parte dos consistorios, así como o interese amosado en todo momento polos veciños, posibilitaron que as xornadas fluísen de forma exitosa e que lograsen o seu principal obxectivo, que era o de servir de axuda para que os participantes no programa de autocompostaxe logren finalmente un compost de alta calidade que cumpra con todos os requisitos normativos para ser aplicado na agricultura e xardinería con garantías e sen restricións.

Durante as formacións materializadas en Pontedeva, Quintela de Leirado, Verea, Celanova, Gomesende, Ramirás, Cartelle e A Merca, os monitores detallaron os pasos a seguir para converter a materia orgánica nun recurso, neste caso, nun fertilizante natural que regresa á terra para dar unha nova vida, constituíndo un dos mellores exemplos de economía circular.

Así, explicaron que o composteiro, con capacidade para 400 litros e fabricado con materiais reciclados e reciclables, debe colocarse no exterior da vivenda, nunha zona protexida das inclemencias meteorolóxicas e en contacto directo coa terra para que os microorganismos descompoñedores poidan facer o seu traballo. Incidiuse tamén nos materiais que poden, e non poden, introducirse no composteiro e, moi importante, déronse a coñecer todos os parámetros que deben estar baixo o control do usuario, isto é, o osíxeno, a temperatura e a humidade, facéndose necesario unha mestura equilibrada entre fracción húmida e seca, que debe removerse e airearse periodicamente.

Algúns dos asistentes aos cursos manifestaron que xa viñan elaborando o seu propio compost hai tempo e que mesmo fabricaran artesanalmente o seu propio recipiente: de madeira, nuns casos, e de plástico e malla, noutros. Con todo, si recoñeceron que, ante determinadas incidencias, descoñecían a forma de actuar, por iso é polo que as charlas supuxeron para eles unha magnífica forma de disipar dúbidas e corrixir erros.

Máis aló da formación, os veciños recibiron unha guía didáctica de autocompostaxe na que se detalla todo o proceso, dando mesmo resposta ás preguntas máis frecuentes.

Beneficios

A autoxestión da materia orgánica, non só posibilitará que os usuarios obteñan o seu propio abono e poidan prescindir da compra de fertilizantes artificiais, senón que poderán reducir a cantidade de residuos que acaban no contedor da rúa, propiciando con isto un aforro de custos, tanto ambientais como económicos.

Saúdos, Departamento de Comunicación