• A declaración recoñece a bicicleta como medio de transporte sostible, accesible e asequible, cun forte valor engadido para a economía da UE

Cerceda, a 8 de abril de 2024.-A UE deu outro paso importante na redución das emisións procedentes do transporte ao adoptar a Declaración Europea sobre o uso da bicicleta. Ao marxe do Consello Europeo informal de Transportes, Adina Vălean, Comisaria de Transportes, asinará a declaración xunto con Karima Delli, Presidenta da Comisión de Transportes do Parlamento Europeo, e Georges Gilkinet, Viceprimeiro Ministro de Bélxica.

A declaración recoñece o uso da bicicleta como medio de transporte sostible, accesible e asequible, cun forte valor engadido para a economía da UE. O documento inclúe compromisos claros, como redes ciclistas seguras e coherentes nas cidades, mellores conexións co transporte público, aparcamentos seguros e acceso a puntos de recarga para bicicletas eléctricas.

Estes compromisos adoptaranse a nivel europeo, nacional, rexional e local. Todos eles son elementos necesarios para mellorar a calidade e cantidade das infraestruturas ciclistas en todos os Estados membros e facer a bicicleta máis atractiva para o público.

Baseada nunha proposta lanzada pola Comisión Europea en outubro de 2023, e en resposta ás peticións do Parlamento Europeo e dos Estados membros, a declaración constitúe un compromiso político conxunto e unha brúxula estratéxica para as políticas e iniciativas actuais e futuras relacionadas co uso da bicicleta.

 A fin de desenvolver todo o seu potencial, o uso da bicicleta debe abordarse axeitadamente nas políticas de mobilidade a todos os niveis de gobernanza e financiamento, planificación do transporte, sensibilización, asignación de espazo, normas de seguridade e infraestruturas axeitadas, cunha atención especial ás persoas con discapacidade ou con mobilidade reducida.

Fonte e imaxe: UE