![Mondoñedo se vuelca con la protección ambiental en el 450 aniversario de la Fiesta del Árbol Mondoñedo se vuelca con la protección ambiental en el 450 aniversario de la Fiesta del Árbol](/sites/default/files/noticias/image/2022-08/Festa%2520da%2520%25C3%25A1rbore.jpeg)
- Tivo lugar o pasado 2 de febreiro cun intenso programa de actividades no que desempeñou un papel fundamental a Asociación O Pasatempo, que contou co apoio incondicional do propio Concello de Mondoñedo, así como coa colaboración da Xunta de Galicia a través de Sogama.
- Foi precisamente o seu presidente, José Antonio Ares, quen falou no programa radiofónico Ecovoz deste tradicional evento cuxa primeira "edición" está documentada en 1569, sendo rexidor Luís de Luaces.
- Actualmente, o goberno municipal está levando a cabo un ambicioso plan de acción na Alameda dos Remedios que inclúe a reposición de árbores en mal estado ,melloras nos accesos, incorporación de mobiliario urbano como bancos e farolas, e a renovación do parque infantil empRazado neste espazo verde.
- O obxectivo último non é outro que preservar o patrimonio natural e mellorar o benestar e calidade de vida da veciñanza.
Cerceda, a 22 de febreiro de 2019.- A árbore é para Mondoñedo un ingrediente fundamental da súa historia e indiscutible patrimonio natural e cultural. Non en van, este fermoso municipio lucense acolle a Festa da Árbore máis antiga de Europa. Así o explicou no programa radiofónico Ecovoz José Antonio Ares, presidente da Asociación O Pasatempo, un colectivo social con máis de dúas décadas de vida ás súas costas que contribúe, co incondicional apoio do Concello, a manter viva a memoria ecolóxica do municipio.
O pasado 2 de febreiro, a vila mindoniense da que emerxeron personalidades tan ilustres como o escritor Álvaro Cunqueiro ou o compositor Pascual Veiga, autor da música do himno galego, celebrou o 450 aniversario da Festa da Árbore, un evento no que se volcou de cheo o goberno local e que tamén contou coa colaboración da Xunta de Galicia a través de Sogama.
Conta José Antonio Ares que en 1560 os veciños adquiriron a alameda ao cabido, pero, debido á peste negra que asolaba a toda Europa, así como aos altos índices de pobreza, tiveron que pasar 9 anos ata que os mindonienses puideron plantala. Por idénticos motivos, os traballos de empedrado das rúas tamén se viron dilatados no tempo. En febreiro de 1569 tivo lugar a que está considerada como a primeira festa destas características de toda Europa.
Con esta conmemoración réndese homenaxe a aqueles que, malia as adversas circunstancias, e baixo o mandato do rexidor Luís de Luaces, puxeron todo o seu empeño en que a árbore estivese presente na vida dos cidadáns de Mondoñedo como elemento de conexión entre pasado, presente e futuro.
O programa cultural que integrou o 2 de febreiro estivo colmado de actividades, que arrancaron cunha ruta pola cidade na que se deron a coñecer os distintos tipos de árbores presentes na mesma, así como o proceso de transformación da urbe ao longo do tempo, acabando o periplo ante a casa de Luís de Luaces, desde onde partiron unhas carrozas como no ano 1902.
A parte máis atractiva e solemne da festa foi a propia plantación de especies autóctonas, que se aderezou con concertos, recitais de poesías, contacontos, entrega de premios de concursos escolares, etc. E para satisfacer os padais dos asistentes, que mellor que premialos cunha “torreznada” gratis, do mesmo xeito que fixera, 450 anos antes, o primeiro edil de Mondoñedo, que obsequiou aos seus veciños con tan enerxética recompensa, tras participar na plantación de árbores.
PLAN DE MELLORA ACOMETIDO POLO GOBERNO LOCAL
Na actualidade, o goberno municipal está levando a cabo un ambicioso plan de acción na Alameda dos Remedios que inclúe a reposición de árbores en mal estado, a mellora nos accesos, a dotación de novo mobiliario urbano como bancos e farolas e a renovación do parque infantil emprazado neste espazo verde único, que serve como lugar de paseo e lecer para os mindonienses, albergando igualmente as festas e feiras máis importantes da localidade.
O obxectivo último non é outro que preservar o patrimonio natural e posibilitar un maior benestar e calidade de vida para os habitantes de Mondoñedo.
Saúdos, Departamento de Comunicación