• Así se recolle na II edición do estudo 'Radiografía do Consumidor Responsable', elaborado polo Observatorio de Consumo e Sostibilidade de Jealsa
• O 20% dos enquisados destaca a "escasa" información sobre a reciclabilidade dos produtos e o 10% manifesta a "dificultade" para coñecer a orixe das materias primas
• Pola súa banda, para o 10%, a sostibilidade e o coidado do medio ambiente inflúen ao 100% na súa decisión de compra, mentres que para un 33% inflúe entre un 30 e un 50%

Cerceda, a 19 de setembro de 2022.- O 62% dos españois afirma practicar un consumo máis respectuoso co medio ambiente tras a pandemia. Así se recolle na II edición do estudo 'Radiografía do Consumidor Responsable', elaborado polo Observatorio de Consumo e Sostibilidade de Jealsa durante o primeiro trimestre deste ano, contando coa participación de 1.200 consumidores.

Respecto a alimentos coma o peixe, só o 21% dos cidadáns consome este produto entre 3 e 4 veces por semana, cantidade recomendada pola Axencia Española de Seguridade Alimentaria e Nutrición. Pola contra, o 46% aumentou o consumo de conservas de peixe e o 22% confirma facelo por ser "máis respectuoso" co medio ambiente. Así mesmo, o 33% comproba que os produtos de peixe e marisco que van adquirir proveñen de sistemas de pesca responsables, mentres que o 45% afirma botar en falta a información necesaria.

Pola súa banda, o 20% destaca a "escasa" información sobre a reciclabilidade do produto e o 10% manifesta a "dificultade" para coñecer a orixe das materias primas, incidindo na necesidade de que exista unha maior transparencia nos envases e máis datos sobre o seguimento do produto.

Así mesmo, para o 10% dos enquisados, a sostibilidade e o coidado do medio ambiente inflúen ao 100% na súa decisión de compra, mentres que para un 33% inflúe entre un 30 e un 50%.

O estudo tamén revela que para o 67% dos españois é "fundamental" que as compañías conten co seu propio programa de Responsabilidade Social Corporativa e que este promova, non só o benestar dos empregados, senón tamén da sociedade, contribuíndo ao desenvolvemento sostible.

Fonte: Gestores de Residuos

Imaxe: Pexels