![El alumnado del CPR Valle Inclán de Ferrol se instruye en el reciclaje de la mano de Sogama El alumnado del CPR Valle Inclán de Ferrol se instruye en el reciclaje de la mano de Sogama](/sites/default/files/noticias/image/2022-08/Charla%2520tipo%2520en%2520cole.jpg)
- Os educadores da Sociedade pública impartirán neste centro unha serie de sesións formativas a través das cales proporcionarán as claves para contribuír de forma eficiente á xestión sostible dos residuos urbanos.
- O principio europeo dos tres erres (reducir, reutilizar e reciclar) constituirá o epicentro da xornada, onde tamén se falará de compostaxe doméstica, así como do cometido industrial de Sogama.
Cerceda, a 14 de xaneiro de 2018.- Os educadores de Sogama desprazaranse este mércores, 16 de xaneiro, a Ferrol para impartir varias sesións formativas no CPR Valle Inclán. Os destinatarios serán ao redor de 80 alumnos e alumnas de educación primaria e secundaria interesados en coñecer con máis detalle a problemática que trae consigo a alta produción de lixo e como facer fronte á mesma desde o fogar, o lugar de traballo, a escola e o tempo de lecer.
EN CLAVE DE “R”
Neste marco, proporcionaránselles as claves para colaborar no sistema, fundamentalmente a través da aplicación do principio europeo dos tres erres: previr e reducir a produción de refugallos en orixe, fomentar a reutilización alonggando a vida útil dos produtos e separar os materiais por tipoloxías para que poidan ser reciclados, unha vez depositados nos contedores correspondentes: amarelo, para envases de plástico, latas e briks; azul, para papel e cartón; iglú verde, para envases de vidro; e recipiente convencional, para a fracción resto.
Tamén se abundará nas vantaxes asociadas á compostaxe doméstica, práctica tradicional no ámbito rural mediante a cal se recupera a materia orgánica transformándoa nun compost de alta calidade que actúa como fertilizante natural.
Dado que, na composición media dunha bolsa tipo, os restos orgánicos supoñen da orde do 42%, se estes se reciclan en orixe, minórase en gran medida a cantidade de lixo a tratar por outras vías e as emisións de CO2 derivadas do transporte.
Sogama dispón dun programa de compostaxe doméstica ao que se adheriron máis de 290 entidades (concellos, centros educativos e colectivos sociais) e entre as que repartiu máis de 9.600 composteiros. Condición imprescindible para participar nesta iniciativa é que as vivendas, colexios ou colectivos conten con terreo (xardín ou horta) no que aplicar o abono resultante, permitindo desta forma pechar o círculo de aproveitamento da materia orgánica e devolvela ao solo en forma de nutrientes.
As explicacións dos monitores estarán acompañadas e reforzadas con recursos didácticos diversos tales como vídeos, presentacións e xogos a fin lograr unha maior implicación dos escolares e afianzar os seus coñecementos.
Así mesmo, trasladaráselles os pormenores do modelo Sogama, ao que están adscritos a meirande parte dos concellos galegos, entre os que se atopa o de Ferrol, e cuxo cometido se orienta á reciclaxe dos materiais susceptibles de ser recuperados por esta vía, e contidos na bolsa amarela e negra, as dúas fraccións xestionadas por esta compañía, e á valorización enerxética, limpa e respectuosa co medio ambiente e a saúde, da parte non reciclable.
Saúdos, Departamento de Comunicación