- O Director Xeral da FAO lembrou que, se ben o Ano Internacional tivo lugar no medio dos numerosos desafíos expostos polas medidas e repercusións do COVID-19, puidéronse lograr os seus principais obxectivos
- Entre estes, destacou a oportunidade de concienciar sobre os beneficios do seu consumo para a saúde, promover dietas equilibradas, reducir a perda e o desperdicio alimentario, e compartir as mellores prácticas de produción sustentable para pequenos agricultores
- Tamén fixo fincapé na importancia do sector das froitas e hortalizas na consecución dos Obxectivos de Desenvolvemento Sostible
Cerceda, a 15 de marzo de 2022.- O Ano Internacional das Froitas e Verduras das Nacións Unidas 2021 concluíu a finais do pasado mes de febreiro cunha cerimonia mundial na que os participantes recoñeceron o aumento da concienciación sobre a función fundamental destes alimentos na mellora dos ingresos dos agricultores, na creación de empregos decentes e no logro da seguridade alimentaria e nutricional mediante a transformación dos sistemas agroalimentarios.
“Durante o Ano, as partes interesadas de todo o mundo levaron a cabo moitas actividades importantes, subliñaron o que se necesita para garantir que estas (as froitas e hortalizas) se produzan, distribúan e consuman de maneira sustentable”, afirmou QU Dongyu, Director Xeral da Organización das Nacións Unidas para a Alimentación e a Agricultura (FAO).
Igualmente, salientou como os numerosos actos nacionais e rexionais —que contaron coa participación de gobernos, o sector privado, a sociedade civil e a comunidade científica— contribuíron a poñer de relevo os beneficios do consumo de froitas e hortalizas para a saúde, a inocuidade e a nutrición.
Lembrou que, se ben o Ano Internacional tivo lugar no medio dos numerosos desafíos expostos polas medidas e repercusións do COVID-19, puidéronse lograr os seus principais obxectivos:
1. concienciar sobre os beneficios do consumo de froitas e verduras para a saúde e a nutrición, e orientar as políticas cara aos devanditos beneficios;
2. promover dietas diversificadas, equilibradas e saudables;
3. reducir a perda e o desperdicio nos sistemas alimentarios das froitas e verduras;
4. compartir as mellores prácticas de produción sustentable para pequenos agricultores.
IMPLICACIÓN MUNDIAL
Ao longo do ano celebráronse moitos actos nacionais e rexionais de múltiples partes interesadas, e leváronse a cabo numerosas iniciativas, podendo destacar a publicación conxunta da FAO e o Centro de Cooperación Internacional en Investigación Agrícola para o Desenvolvemento “Froitas e hortalizas: Oportunidades e desafíos para a agricultura sostible a pequena escala” e a súa orientación oportuna para os responsables da toma de decisións, os agricultores e os actores da cadea de valor.
Así mesmo, a FAO fortaleceu a súa colaboración coa Sociedade Internacional da Ciencia Hortícola e a súa enorme rede mundial de expertos mediante a firma dun memorando de entendemento.
QU Dongyu tamén fixo fincapé na importancia do sector das froitas e as hortalizas na consecución dos Obxectivos de Desenvolvemento Sostible. O Marco estratéxico da FAO para o período 2022-2031, pretende apoiar a Axenda 2030 por medio da transformación cara a sistemas agroalimentarios máis eficientes, inclusivos, resilientes e sustentables, con miras a lograr unha mellor produción, unha mellor nutrición, un mellor medio ambiente e unha vida mellor para todos.
Fonte: ONU
Imaxe: Pexels
