• Sucedeu tralo paso do furacán Walaka, que golpeou a rexión o pasado mes de outubro.
• A illa tiña ao redor de 0,8 quilómetros de longo e 400 pés de ancho, e era a segunda máis grande dentro do atolón ubicado ao noroeste das illas principais de Hawai.
• Xunto coa  veciña Illa Tern, constituía un lugar de anidamento crítico para especies ameazadas como as focas monxe, que conta con ao redor de 1.400 individuos, e as tartarugas mariñas verdes, esta última en perigo de extinción segundo a UICN.
• Non está claro se East Island foise de forma permanente ou se algún día poderá rexurdir do océano, aínda que, se así fose, tardaría anos en volver a desenvolverse e en ser capaz de albergar e soster de novo ás especies que un día a habitaron.

Cerceda, a 17 de xaneiro de 2019.- Os perversos efectos do cambio climático cobráronse unha nova vítima. Neste caso foi a East Island, ubicada en French  Frigate Shoals (un gran atolón ao noroeste das illas principais de Hawai) que desapareceu baixo  o océano o pasado mes de outubro, tralo paso do furacán Walaka. Así o evidenciaron as imaxes satelitais das illas hawaianas tras este virulento fenómeno meteorolóxico.

A illa tiña ao redor de 0,8 quilómetros de longo e 400 pés de ancho, e era a segunda máis grande dentro do atolón. Ata 1952 acolleu  unha estación da Garda Costeira de Estados Unidos. Xunto coa  veciña Illa Tern, era lugar de anidamento crítico para especies ameazadas como as focas monxe, que conta con ao redor de 1.400 individuos, e as tartarugas mariñas verdes, esta última en perigo  de extinción segundo a UICN.

De feito, sete investigadores que estudan as especies da illa foron evacuados cando a tormenta se achegaba ao atolón. O obxectivo  do equipo era precisamente lograr unha mellor comprensión da idade da illa e como esta e  outras se ven afectadas polo cambio climático.

A desaparición da illa foi un duro golpe para os científicos. Non obstante, Chip Fletcher, profesor de Ciencias da Terra na Universidade de Hawai, recoñece tamén que agora representa unha oportunidade para comprender que as illas como East Island, que logrou existir durante uns 2.000 anos, son máis vulnerables do que se se pensa ante o cambio climático.

O biólogo de conservación da Administración Nacional Oceánica e Atmosférica (NOAA), Charles Littnan, explicou a Honolulu  Civil Beat que ao redor dunha  sétima parte das focas monxe de Hawai do mundo naceron na East Island. En torno ao 16% de todas as especies de focas viven en French  Frigate Shoals e, aproximadamente o 30% desta poboación tiña crías nesta illa.

TORMENTAS E AUMENTO DO NIVEL DO MAR

Os científicos móstranse preocupados pola frecuencia deste tipo de tormentas como consecuencia do quecemento dos océanos. Malia que os furacáns virulentos son raros en torno ás illas hawaianas debido a unha combinación de fortes cizallas de vento de nivel superior e unha rexión próxima de auga fría e que xuntas actúan como un escudo de tormenta, o certo é que se aprecia que os furacáns do Pacífico medio tenden cara ao norte, levándoos ás rexións onde se atopan os atolóns como o French  Frigate Shoals.

Ademais de ser máis frecuentes as tormentas e furacáns, o aumento do mar tamén supón outra ameaza para  moitas illas baixas. De feito, en 2016 cinco illas do Pacífico, parte do arquipélago das Illas Salomón, desapareceron baixo as olas debido ao aumento do nivel do mar. En novembro  do pasado ano sucedeu o mesmo con oito  illas en Micronesia, como a illa Nahlapenlohd, onde tivo lugar unha famosa batalla entre dous reinos micronesios rivais.

Non está claro se East Island foise de forma permanente ou se algún día poderá rexurdir do océano, aínda que, se así fose, tardaría anos en volver a desenvolverse e ser capaz de albergar e soster de novo ás especies que un día a habitaron.

Fonte e imaxe: www.sciencetrends.com

Saúdos, Departamento de Comunicación