• O vicedirector do centro, e á súa vez profesor do Ciclo Superior de “Programación da produción en moldeamento de metais e polímeros”, dirixe na actualidade unha actividade iniciada hai dous anos e enmarcada no proxecto “Precious Plastics”, con cobertura mundial.
• A operativa inclúe unha máquina trituradora, outra de extrusión, unha terceira de inxección e outra máis de compresión, permitindo así dar forma ao plástico e crear produtos de diferentes tamaños e funcionalidades.
• Estas máquinas foron cedidas temporalmente a unha asociación sen ánimo de lucro “Picos do Sol” co fin de mostrar á cidadanía as súas prestacións, constituíndo unha interesante opción para recuperar o plástico in situ.
• O proxecto circulará proximamente por distintos institutos de Educación Secundaria da comarca de Ferrolterra (Fene, Neda e Narón).

Cerceda, a 18 de decembro de 2019.-  A innovación ambiental ten o seu espazo, xa consolidado, no IES Ila de Sarón de Xove (Lugo), desde onde se está a proxectar a outros puntos da comunidade.

O vicedirector do centro, e á súa vez profesor do Ciclo Superior de “Programación da produción en moldeamento de metais e polímeros”, José Javier Melgar Bellido, dá continuidade á fabricación, por parte do alumnado deste ciclo, de catro máquinas recicladoras de plásticos; unha acción enmarcada no proxecto “Precious Plastics”, con cobertura mundial e a través da cal se pretende favorecer a autorreciclaxe e intensificar a loita contra a contaminación plástica.

TRITURACIÓN, EXTRUSIÓN, INXECCIÓN E COMPRESIÓN

A operativa inclúe unha máquina trituradora, onde os plásticos se converten en escamas a fin de modelalas posteriormente. O usuario pode seleccionar o tamaño de saída das mesmas unicamente cambiando a peneira. Desta forma pode crear diferentes patróns e procesos.

As escamas insírense na tolva da máquina de extrusión, onde se moldean e esmagan para crear unha liña de plástico a partir da cal se obteñen novas materias primas tales como filamentos de impresión 3D e plástico granulado, ao que se pode dar formas creativas.

A través da máquina de inxección, as escamas de plástico quéntanse e inxéctanse nun molde. É un proceso relativamente rápido para crear obxectos pequenos de forma repetida.

Na de compresión, o plástico quéntase dentro do forno e presiónase lentamente nun molde cun roubo de automóbil, resultando axeitada para dar forma a obxectos grandes e máis sólidos. O forno en si tamén é unha gran máquina para a creación de prototipos e probas de plástico.

As máquinas foron cedidas temporalmente a unha asociación sen ánimo de lucro “Picos do Sol” a fin de mostrar á cidadanía as súas funcionalidades e prestacións, constituíndo unha interesante opción para recuperar o plástico in situ e convertelo en novos produtos.

O proxecto circulará proximamente por distintos institutos de Educación Secundaria da comarca de Ferrolterra (Fene, Neda e Narón).

SOBRE PRECIOUS PLASTIC

O proxecto Precious Plastic, que comezou a súa andaina en 2013, está conformado por unha comunidade global de centos de persoas que traballan para aportar solucións á contaminación derivada do plástico, compartindo coñecemento, ferramentas e técnicas de forma gratuíta.

Toda a información en https://preciousplastic.com/    

Saúdos, Departamento de Comunicación