• Cada europeo xerou 188,7 kg de residuos de envases en 2021, unha cifra que se agarda aumente a 209 kg en 2030 se non se toman medidas adicionais

• A partir dese ano, algúns tipos de envases de plástico dun só uso quedarán prohibidos, á vez que se fixan tamén obxectivos específicos de reutilización. Así mesmo, os envases terán que ser reciclables

Cerceda, a 2 de maio de 2024- En días pasados, o Parlamento Europeo aprobou novas medidas para facer os envases máis sostibles. As normas inclúen obxectivos de redución de envases (5 % para 2030, 10 % de aquí a 2035 e 15 % para 2040) e esixen aos países da UE que diminúan, en particular, a cantidade de residuos de envases de plástico.

Cada europeo xerou 188,7 kg de residuos de envases en 2021, unha cifra que se agarda aumente a 209 kg en 2030 se non se toman medidas adicionais.

A fin de minimizar os envases innecesarios, establécese unha ratio máxima de espazo baleiro do 50 % para os envases colectivos, de transporte e de comercio electrónico. Os fabricantes e importadores tamén terán que velar por reducir ao mínimo o peso e o volume dos envases.

A partir do 1 de xaneiro de 2030, algúns tipos de envases de plástico dun só uso quedarán prohibidos. É o caso dos envases de froitas e verduras frescas sen procesar, os de alimentos e bebidas que se serven e consomen en cafeterías e restaurantes, os de porcións individuais (para, por exemplo, condimentos, salsas, crema, azucre), os envases pequenos de produtos de hixiene persoal e as bolsas de plástico moi lixeiras (de menos de quince micras).

Con vistas a previr efectos nocivos para a saúde, o texto inclúe a prohibición do uso das chamadas «substancias químicas eternas» (substancias perfluoroalquiladas e polifluoroalquiladas ou PFAS) por riba de certos limiares nos envases en contacto con alimentos.

Fomentar a reutilización e a opción de recarga

A lei fixa, no horizonte de 2030, obxectivos específicos de reutilización para os envases de bebidas alcohólicas e non alcohólicas (excepto, por exemplo, leite, viño, viño aromatizado, licores), os envases para transporte e venda, así como os envases colectivos (que inclúen varios produtos).

Os distribuidores finais de bebidas e comida para levar terán que ofrecer aos consumidores a opción de achegar o seu propio recipiente. Tamén se lles esixirá que se esforcen por ofrecer o 10 % dos produtos nun formato de envase reutilizable de aquí a 2030.

Envases reciclables

Segundo as novas normas, todos os envases (excepto os de madeira lixeira, cortiza, téxtil, caucho, cerámica, porcelana e cera) terán que ser reciclables, cumprindo uns criterios estritos. Igualmente, inclúen obxectivos mínimos de contido reciclado para os envases de plástico e obxectivos mínimos de reciclaxe por peso dos residuos de envases.

De aquí a 2029, o 90 % dos envases de bebidas de plástico e metal dun só uso (ata tres litros) terán que recollerse por separado (mediante sistemas de depósito e devolución ou outras solucións que garantan o cumprimento do obxectivo de recollida).

Fonte e imaxe: Parlamento Europeo