• Considera que urxe resolver a tripla emerxencia planetaria do cambio climático, a perda de biodiversidade e a contaminación.
• No marco da quinta sesión da Asemblea das Nacións Unidas para o Medio Ambiente (UNEA-5), acordouse unha nova estratexia a medio prazo (2022 a 2025) e estableceuse unha visión do papel fundamental do PNUMA no cumprimento dos obxectivos da Axenda 2030.
• Os líderes de máis de 150 países que participaron neste evento advertiron que o mundo corre o risco de novas pandemias se non cambiamos a forma en que nos relacionamos coa natureza.

Cerceda, a 4 de marzo de 2021.- No marco da quinta sesión da Asemblea das Nacións Unidas para o Medio Ambiente (UNEA-5), celebrada de forma presencial e vía en liña, ministros de Medio Ambiente e outros líderes de máis de 150 países que participaron na mesma advertiron que o mundo corre o risco de novas pandemias se non cambiamos a forma en que nos relacionamos coa natureza.

Esta Asemblea reúnese cada dous anos para establecer as prioridades das políticas ambientais mundiais e as decisións e resolucións adoptadas polos Estados Membros definen o traballo do Programa das Nacións Unidas para o Medio Ambiente (PNUMA).  Nesta ocasión déronse cita milleiros de participantes en liña, incluídos máis de 1.500 delegados de 153 Estados Membros da ONU e máis de 60 ministros de Medio Ambiente. Entre outras cuestións, abordouse como construír un mundo pospandémico  resiliente e inclusivo.

DECLARACIÓN POLÍTICA

Nunha declaración política acordada ao final do encontro, os Estados Membros reafirmaron ao PNUMA como a autoridade ambiental líder no mundo e fixeron unha chamada a un multilateralismo máis amplo para abordar os desafíos ambientais.

A declaración establece que a Asemblea “desexa fortalecer o noso apoio ás Nacións Unidas e á cooperación multilateral, e segue convencida de que a acción colectiva é esencial para abordar con éxito os desafíos globais”. Así mesmo, advirte que “a saúde e o benestar humanos dependen máis que nunca da natureza e as solucións que esta ofrece, e somos conscientes de que enfrontaremos riscos recorrentes de futuras pandemias se mantemos os actuais patróns insostibles nas nosas interaccións coa natureza”.

A Asemblea acordou unha nova estratexia a medio prazo (2022 a 2025) e estableceu unha visión do papel fundamental do PNUMA no cumprimento dos obxectivos da Axenda 2030.

Neste sentido, a directora executiva desta organización,  Inger Andersen, sinalou que “A estratexia está dirixida a transformar a forma en que o  PNUMA opera e se relaciona cos Estados Membros, as axencias da ONU, o sector privado, a sociedade civil e os grupos de mozos, para que podamos traballar máis duro, máis rápido e máis forte”.

No período previo á Asemblea, o PNUMA, xunto co secretario xeral da ONU,  António  Guterres, presentou un novo informe “Facer as paces coa natureza”, que ofrece un plan integral para resolver a tripla emerxencia planetaria do cambio climático, a perda de biodiversidade e a contaminación.

Tamén se levaron a cabo varios eventos en apoio da  UNEA-5, incluída unha Asemblea Mundial de Mozos, un Foro de Ciencia, Políticas e Empresas sobre o Medio Ambiente e o lanzamento dunha Alianza Mundial para a Economía Circular e a Eficiencia dos Recursos.

Fonte: ONU Medio Ambiente

Imaxe: Pexels