• Joaquín Pérez Viota lembrou, nun encontro informativo con medios, que España conta a día de hoxe con tan só 11 plantas de valorización enerxética nas que se tratan o 11% dos residuos non reciclables producidos, desviando a vertedoiro o 50%

• Asegurou que as plantas de valorización enerxética son as que teñen o nivel de emisións de CO2 máis baixo dentro do sector industrial, pesando sobre as mesmas un rigoroso control ambiental

Cerceda, a 10 de xullo de 2024.- Nun encontro informativo con distintos medios de comunicación, celebrado en Madrid, o novo presidente da Asociación de Empresas de Valorización Enerxética de Residuos Urbanos (AEVERSU), Joaquín Pérez Viota, manifestou que o sector debe duplicar a súa capacidade de tratamento en España para cumprir cos obxectivos europeos.

Neste sentido, lembrou que, a día de hoxe, España conta cun total de 11 plantas de valorización enerxética públicas, privadas e de xestión mixta, situadas en Galicia, País Vasco, Cataluña, Baleares, Cantabria e a Cidade Autónoma de Melilla, nas que se valoriza enerxeticamente o 11% dos refugallos non reciclables, concretamente 2,5 millóns de toneladas dos 22 millóns xerados. Non obstante, o 50% aínda se segue a soterrar en vertedoiro no noso país.

A Lei 7/2022, del 8 de abril, de residuos e solos contaminados para unha economía circular, que transpón unha directiva europea, esixirá que, en 2035, España recupere o 65% dos seus residuos e que o vertido se limite ao 10%, polo que Pérez Viota estima que a fracción non reciclable sometida a valorización enerxética debería elevarse ata os 5,5 millóns de toneladas. Ao respecto, sinalou que, ou ben se poden ampliar as plantas existentes ou ben se poden implementar outras novas.

A valorización enerxética é a conversión daqueles residuos que non poden ser reciclados en enerxía, xa sexa en forma de electricidade, vapor ou auga quente para uso doméstico ou industrial. En Europa existen máis de 500 plantas de valorización enerxética e, no norte do continente, están dentro dos núcleos urbanos e subministran enerxía para calefacción.

O presidente de Aeversu asegurou que as plantas de valorización enerxética son as que teñen o nivel de emisións de CO2 máis baixo dentro do sector industrial e sobre as mesmas pesa un rigoroso control ambiental, destacando que o 50% da enerxía que xeran é de orixe renovable. En todo caso, Viota subliñou que, segundo as probas realizadas con carbono 14, esta porcentaxe debe elevarse ao 60%.

Fonte: Gestores de Residuos

Imaxe: Aeversu