• O seu principal obxectivo é evitar a acumulación nos fogares de equipos e aparellos destas características en desuso, propiciando a súa correcta xestión e, xa que logo, a recuperación dos materiais valiosos que conteñen.
•  Cunha duración de 3 anos (culminará en abril de 2021), esta iniciativa pretende desenvolver e implementar un enfoque de economía circular para produtos e servizos sostibles a través das súas cadeas de valor e subministración.
• Trátase dun proxecto de innovación colaborativa internacional no que participan 17 socios de 8 países europeos, estando apoiado polo programa de Economía Circular H2020 da Comisión Europea. 

Cerceda, a 22 de outubro de 2020.- Dadas as insuficientes taxas de reutilización e reciclaxe de aparellos eléctricos e electrónicos fóra de uso, o proxecto europeo CIRC4LIFE, cuxo obxectivo é implantar novas estratexias de economía circular en diferentes sectores, propuxo un sistema de incentivos para fomentar entre a cidadanía a reutilización e a reciclaxe destes residuos, premiando aos usuarios que os entreguen nos puntos habilitados, ben con descontos ou propoñéndolles accións ambientais como plantar unha árbore no seu nome.

A través de enquisas en diferentes países europeos, comprobouse que moitos dos aparellos eléctricos e electrónicos tales como equipos persoais de telefonía, navegación por internet e pequenos aparellos con pantalla, almacénanse nos fogares durante anos, onde quedan esquecidos sen posibilidade de recibir unha xestión axeitada, desperdiciando deste xeito os materiais valiosos que conteñen.

Mediante o uso de contedores intelixentes, CIRC4Life introduce elementos de trazabilidade na recollida xeral deste RAEEs, poñendo a disposición unha aplicación que se pode descargar a través do teléfono móbil, así como unha plataforma informática de soporte da base de datos necesaria.

No futuro, se se dispón da información sobre os materiais e pezas dos aparellos eléctricos e electrónicos –extremo que depende dos fabricantes-, este procedemento facilitaría un desensamblaxe coñecido e selectivo de materiais críticos que, cun alto valor engadido, poderían incorporarse a diferentes procesos industriais con maior facilidade que na actualidade.

SOBRE CIRC4Life

Trátase dun proxecto de innovación colaborativa internacional, formado por 17 socios de 8 países europeos, e apoiado polo programa de Economía Circular H2020 da Comisión Europea. 

O orzamento do proxecto asciende a 7.228.773 €, importe que inclúe unha subvención de 6.294.033 € da Comisión. 

Cunha duración de 3 anos (comezou en mayo de 2018 e culminará en abril de 2021), ten como obxectivo desenvolver e implementar un enfoque de economía circular para produtos e servizos sostibles a través das súas cadeas de valor e subministración.

Os novos modelos de negocio de economía circular demostraranse a gran escala en catro áreas industriais: produtos de iluminación doméstica e industrial; cultivo de hortalizas e alimentos cadea de subministración de carne; e reciclaxe e reutilización de tabletas informáticas. 

Desenvolverase unha plataforma TIC para apoiar o desenvolvemento, implementación, demostración e comunicación.

Fontes: Residuos Profesional e CIRC4Life

Imaxe: Pixabay