- Liderado por AIMPLAS, chegou ao seu fin logo de tres intensos anos de traballo para aportar solucións integrais á correcta xestión dos residuos voluminosos.
- Durante a conferencia final, déronse a coñecer os resultados desta iniciativa, á vez que se explicaron os programas piloto que se desenvolveron en Flandes, Valencia, Izmir e Varsovia, ademais de expoñer distintas recomendacións para mellorar a lexislación europea sobre residuos voluminosos.
- Así mesmo, publicáronse dúas guías de ecodeseño e de implementación que se presentaron ante autoridades locais e rexionais en Bruxelas por parte de ACR+.
- Aliñado coa Economía Circular, URBANREC está orientado igualmente cara ao cumprimento do Obxectivo de Desenvolvemento Sostible (ODS) número 12 para un consumo e produción sostible das Nacións Unidas.
Cerceda, a 14 de novembro de 2019.- O proxecto URBANREC chegou ao seu fin logo de tres intensos anos de traballo para aportar solucións integrais, tanto técnicas como loxísticas, ao correcto tratamento dos residuos voluminosos, cuxa produción ascende na Unión Europea a 19 millóns de toneladas anuais, das cales o 60% acaba en vertedoiro.
Liderado por AIMPLAS (Instituto Tecnolóxico do Plástico) e enmarcado na convocatoria europea Horizón 2020, no mesmo participaron 21 entidades de diferentes países.
Durante a conferencia final, celebrada na sede do Parlamento Europeo, en Bruxelas, déronse a coñecer os resultados desta iniciativa, á vez que se explicaron os programas piloto que se desenvolveron en Flandes, Valencia, Izmir e Varsovia. Expuxéronse tamén distintas recomendacións para mellorar a lexislación europea sobre residuos voluminosos, así como as boas prácticas relacionadas coa reutilización e as estratexias de recollida selectiva, deixando constancia dos logros das empresas para a valorización de materiais como plásticos, espumas, téxtis e madeira.
Desta forma, implementáronse sistemas innovadores de recollida e reutilización adaptadas a cada país. Por exemplo, en Turquía, onde non existía unha rede de puntos limpos ou ecoparques, conseguiuse poñer en marcha o primeiro deles no marco deste proxecto. En Bélxica lanzouse unha cadea de tendas de segunda oportunidade e, en Valencia, contedores para a reutilización.
Respecto do tratamento, desenvolvéronse novos procesos de separación e desmontaxe de residuos voluminosos para a obtención de produtos reciclados de alto valor engadido como adhesivos e espumas para colchóns, disolventes ou aditivos, espumas/téxtis para illamento térmico, composites reforzados con fibras e feltros, e plásticos reforzados como os WPC (Wood Plastic Compound), e todo isto mediante solucións innovadoras de reciclado mecánico e químico como a fragmentación por corte 3D e a hidrogasificación catalítica por plasma.
Así mesmo, publicáronse dúas guías de ecodeseño e de implementación que se presentaron ante autoridades locais e rexionais en Bruxelas por parte de ACR+. A difusión das mesmas ao público tamén se realizará a través da web do proxecto nunha plataforma de e-learning.
Aliñado coa Economía Circular, URBANREC está orientado igualmente cara ao cumprimento do Obxectivo de Desenvolvemento Sostible (ODS) número 12 para un consumo e produción sostible das Nacións Unidas, toda vez que os residuos convértense en recursos, introdúcense no circuíto económico aqueles produtos que xa non responden ás necesidades iniciais dos consumidores e poténciase a reutilización e a reciclaxe.
Fonte e imaxe: AIMPLAS
Saúdos, Departamento de Comunicación
