• A entidade presentou en Madrid un proxecto piloto que se desenvolverá en seis municipios españois para avaliar a efectividade e operatividade do sistema de recollida de téxtiles

Cerceda, a 11 de outubro de 2024.- A Asociación para a Xestión do Residuo Téxtil e o Calzado, formada por grandes marcas tales como Decathlon, El Corte Inglés, H&M, IKEA, Inditex, KIABI, Mango, Primark, Sprinter/JD e Tendam, presentou en Madrid Re-Viste, o novo nome baixo o cal operará o SCRAP (Sistema Colectivo de Responsabilidade Ampliada do Produtor) a partir de agora.

No encontro, déronse a coñecer algúns detalles dun proxecto piloto que dará comezo en 2025 e que permitirá avaliar a efectividade e a operatividade do sistema. Estará supervisado por un Comité, conformado polo Grupo de Traballo do Residuo Téxtil da FEMP e Re-Viste, que fará un seguimento da súa correcta implementación en seis municipios representativos das diferentes contornas sociodemográficas: dous urbanos, dous rurais e dous semiurbanos, cunha poboación total de ao redor de 300.000 habitantes.

O director xeral de Re-Viste, o galego Juan Ramón Meléndez, explicou que “Este proxecto piloto é un paso importante para reunir a todos os actores crave e traballar xuntos na creación dun sistema eficiente e sostible que permita establecer unha correcta recollida de téxtiles e calzado, en liña cos desafíos regulatorios e a demanda da sociedade”.

Análise de diversas opcións de recollida

No marco do piloto, analizaranse diversas opcións para a recollida de residuos téxtiles co fin de instaurar un sistema eficiente que se adapte a diferentes contextos municipais. As opcións de recollida incluirán a instalación de contedores específicos na vía pública e en puntos limpos municipais. Ademais, habilitaranse puntos de recollida en espazos privados como centros comerciais, tendas, colexios e parroquias, ampliando a rede de recolección a diferentes contornas e facilitando a participación cidadá.

Unha vez recollidos, os produtos téxtiles serán transportados a plantas de clasificación, onde se avaliarán seguindo o principio de xerarquía de residuos. Os artigos que se atopen en bo estado, destinaranse á venda en tendas de segunda man. Aqueles que non estean en disposición de ser reutilizados, serán clasificados en función da súa composición (como algodón ou poliéster) para facilitar a súa posterior reciclaxe, co obxectivo de transformalos en novos tecidos.

O proxecto piloto terá unha duración mínima dun ano. Ao concluír, preténdese elaborar unha guía de recomendacións  na que se incluirán as boas prácticas identificadas para ofrecer aos entes locais ferramentas e orientacións que lles permitan implementar con éxito a recollida selectiva de téxtiles nos seus territorios.

Tal e como manifestou Meléndez, “O sistema que estamos a crear non só facilitará a xestión de téxtiles, senón que tamén promoverá un modelo sostible que involucre a todos os actores da cadea de valor. A colaboración e a participación son craves para facer efectiva a economía circular do téxtil, permitindo a cada persoa e empresa contribuír a un futuro máis eficiente e innovador”.

Fonte e imaxe: Retema