- Disto deixou constancia durante a celebración conxunta do 19º Congreso Nacional da Recuperación e a Reciclaxe e a 4 th European Recycling Conference, coorganizados por FER e EuRIC
- O evento, que tivo lugar en Madrid (IFEMA), contou con máis de 500 congresistas rexistrados
Cerceda, a 17 de xuño de 2022.- Durante os pasados días 15 e 16 de xuño, celebrouse en Madrid, concretamente en IFEMA, e de forma conxunta, o 19º Congreso Nacional da Recuperación e a Reciclaxe e a 4 th European Recycling Conference, coorganizados pola Federación Española da Recuperación e a Reciclaxe (FER) e a Confederación Europea de Industrias da Reciclaxe ( EuRIC, nas súas siglas en inglés).
Con máis de 500 congresistas rexistrados, o evento xuntaba, por primeira vez, aos dous maiores congresos sobre recuperación e reciclaxe en Europa, dando a coñecer tamén os últimos avances en maquinaria e tecnoloxía ao servizo da transformación de residuos en recursos, que teñen o seu espazo no Salón Internacional da Recuperación e a Reciclaxe (SRR).
No acto inaugural, Mariano González, viceconselleiro de Medio Ambiente e Agricultura da Comunidade de Madrid, quixo agradecer “o esforzo do sector da reciclaxe durante os meses de pandemia, demostrando que son un recurso esencial”. Tamén aludiu ao difícil contexto económico actual, “complicado aínda máis coa invasión rusa de Ucraína, que é un ataque contra a liberdade e que condiciona a nosa actividade económica, polo que o reto é maiúsculo”. Con todo, “este escenario non nos debe facer baixar os brazos, todo o contrario, debemos intensificar e redobrar esforzos, e para avanzar no cumprimento dos obxectivos temos que apostar pola regulación e o equilibro do tridente: os papeis públicos, a innovación tecnoloxía e o papel das empresas”.
O viceconselleiro sinalou que as protagonistas da recuperación “son as empresas do sector da reciclaxe”, polo que “non se trata de potenciar o público, senón de garantir a actividade privada, sempre ben regulada, para conseguir a descarbonización”.
Pola súa banda, Ión Olaeta, presidente de FER, sinalou que o futuro dos recicladores “está a xogarse en Europa, debido a que as principais políticas están a ditarse desde Bruxelas”. “Decisións que nos parecen moi afastadas, ao cabo do tempo acabarán repercutindo no noso día a día e na nosa conta de resultados”,
“Agora mesmo estamos ante un verdadeiro tsunami lexislativo nos ámbitos europeo e nacional e, por iso, é fundamental o labor e o enorme esforzo que estamos a realizar desde EuRIC e FER en representación e defensa do noso sector”, explicou Olaeta.
PREMIO NAI TERRA
No marco deste congreso, FER concedeu o Premio Nai Terra, a máxima distinción que outorga anualmente, á Confederación Europea de Industrias da Reciclaxe ( EuRIC, nas súas siglas en inglés) polo seu forte compromiso e firme defensa da protección do medio ambiente, a reciclaxe e a saúde humana, así como pola súa importante contribución á divulgación dos valores ambientais á sociedade.
Fonte e imaxe: Retema
