• Un estudo recente estimou a pegada de carbono das millas de alimentos, isto é, a distancia percorrida por estes desde a produción ata o consumo
• Os investigadores tamén estimaron que as emisións do sistema alimentario mundial son de 15,8 GtCO 2 e, o que equivale ao 30 % das emisións de GEI do mundo

Cerceda, a 13 de abril de 2023.- Coa crecente demanda de diversos produtos alimenticios, o transporte converteuse nun elo crave nas cadeas mundiais de subministración de alimentos.

Un estudo recente estimou a pegada de carbono das millas de alimentos, isto é, a distancia percorrida por estes desde a produción ata o consumo. As emisións de 'millas de alimentos' calculouse utilizando un modelo multirrexional global que incorpora a distancia de transporte, a masa de alimentos e o tipo de transporte co factor de emisión relevante (taxa á que ese vehículo en particular libera CO2 no aire). Tamén se calcularon as emisións totais do sistema alimentario, que inclúen as emisións das millas de alimentos, a súa produción e as emisións por cambio de uso da terra.

Cando se considerou toda a cadea de subministración de alimentos nesta análise, atoparon que as millas de alimentos globais equivalen a aproximadamente 3,0 gigatoneladas de dióxido de carbono equivalente (GtCO 2 e), máis do que se pensaba anteriormente. Isto indica que o transporte representa o 19% das emisións totais do sistema alimentario.

O transporte de froitas e verduras contribúe co 36% das emisións das millas de alimentos, ao redor do dobre da cantidade de gases de efecto invernadoiro (GEI) liberados durante a súa produción. Así mesmo, os investigadores descubriron que as emisións das millas de alimentos constituían o 27 % das emisións totais de carga, principalmente do comercio internacional (18 %), estimando tamén que as emisións do sistema alimentario mundial son de 15,8 GtCO 2 e, o que equivale ao 30 % das emisións de GEI do mundo.

Cun gasto mundial en alimentos de ao redor de 5 billóns de dólares estadounidenses (4,85 billóns de euros) en 2017 e unha poboación mundial en crecemento, resulta útil considerar os impactos das millas alimentarias no cambio climático. De aí a necesidade de promover o consumo de alimentos locais, coa particularidade de que unha maior seguridade alimentaria a través dunha mellor xestión dos sistemas alimentarios tamén require a integración de obxectivos de protección ambiental.

Fonte: Retema

Imaxe: Pexels