• Baixo o lema "Celebrando as maneiras en que os mozos/as lideran como axentes de cambio para os Obxectivos Mundiais", o vindeiro sábado, 12 de agosto, celebrarase o Día Internacional da Xuventude

• Con motivo desta efeméride, a ONU pon de relevo a importancia de dotar aos mozos/as das competencias ecolóxicas necesarias para desenvolverse no actual escenario de cambio e facer posible a consecución dos ODS

Cerceda, a 10 de agosto de 2023.- Con motivo do Día Internacional da Xuventude, que se celebrará o vindeiro sábado, 12 de agosto, o Secretario Xeral da ONU, António Guterres, pide aos gobernos que fagan da participación dos mozos/as nas decisións e políticas, a norma e non a excepción. Considera de gran importancia garantir que estes adquiran e apliquen habilidades na florecente economía verde para dar forma a un futuro máis limpo, máis verde e máis resistente ao clima.

A Organización das Nacións Unidas considera que o éxito da transición cara a un mundo máis verde dependerá do desenvolvemento de competencias verdes na poboación, entendidas coma "os coñecementos, capacidades, valores e actitudes necesarios para vivir, desenvolver e apoiar unha sociedade sostible e eficiente no uso dos recursos". Entre elas inclúense coñecementos e competencias que permiten o uso eficaz de tecnoloxías e procesos ecolóxicos en contornas profesionais, así como competencias transversais que se basean nunha serie de coñecementos, valores e actitudes para facilitar a toma de decisións sostibles desde o punto de vista ambiental, tanto no traballo como na vida.

E aínda que as competencias ecolóxicas son pertinentes para persoas de todas as idades, teñen maior importancia para os máis novos, que poden contribuír á transición ecolóxica durante un período de tempo máis longo.

Para conmemorar o Día Internacional da Xuventude, a ONU, a través da Oficina para a Xuventude, levará a cabo unha campaña coa que pretende mostrar a resiliencia, o enxeño e o liderado dos mozos/as cando se trata de crear un mundo mellor para todos. Baixo o lema "Celebrando as maneiras en que os mozos/as lideran como axentes de cambio para os Obxectivos Mundiais", a Oficina entregará as súas canles dixitais (redes sociais, sitio web, correo electrónico) a un mozo/a diferente cada día durante todo o mes de agosto, culminando nunha adquisición única dun mes de duración que mostra a gran cantidade de formas interseccionais en que a xuventude está a contribuír ao logro dos ODS en todo o mundo.

Mozos preparados

Na actualidade, hai 1.200 millóns de mozos/as de 15 a 24 anos, o 16% da poboación mundial.  En 2030, data límite para os Obxectivos de Desenvolvemento Sostible (ODS), estímase que a cantidade de mozos/as aumentaría nun 7%, chegando a case 1.300 millóns.

A transición ecolóxica suporá a creación de 8,4 millóns de postos de traballo para os mozos/as de aquí a 2030 e, neste escenario, necesitan estar ben preparados en competencias ecolóxicas para desenvolverse no actual contexto de cambio.

Os impactos combinados dos desastres climáticos, os conflitos, a recesión económica e os efectos persistentes da COVID-19 están a reverter o progreso do desenvolvemento. A ONU considera que, se non se toman medidas urxentes agora, a Axenda 2030 converterase en máis nada que unha visión dun mundo que podería ter sido. Ante esta realidade, os mozos/as continúan a ser a esperanza.

Fonte e imaxe: ONU