• O informe “Cerrar el grifo: cómo el mundo puede poner fin a la contaminación por plásticos y crear una economía circular”, apunta a que a contaminación por plásticos podería reducirse nun 80% de aquí a 2040 se os países e as empresas realizan profundos cambios nas súas políticas e mercados utilizando as tecnoloxías existentes
• O documento propón, en primeira instancia, eliminar os plásticos problemáticos e innecesarios para reducir a magnitude do problema, avogando posteriormente por tres cambios no mercado: reutilizar, reciclar e reorientar-diversificar os produtos

Cerceda, a 4 de xuño de 2023.- Segundo un novo informe do Programa das Nacións Unidas para o Medio Ambiente (PNUMA), a contaminación por plásticos podería reducirse nun 80% de aquí a 2040 se os países e as empresas realizan profundos cambios nas súas políticas e mercados utilizando as tecnoloxías existentes.

O informe “Cerrar el grifo: cómo el mundo puede poner fin a la contaminación por plásticos y crear una economía circular”, publícase para a segunda rolda de negociacións en París sobre un acordo mundial co que poñer fin á contaminación por plásticos, e nel expóñense a magnitude e a natureza das medidas necesarias.

Cambios cara á circularidade

En primeiro lugar, o informe propón eliminar os plásticos problemáticos e innecesarios para reducir a magnitude do problema e reducir a contaminación por plásticos nun 80% en todo o mundo de aquí a 2040. Posteriormente, avoga por tres cambios no mercado: reutilizar, reciclar e reorientar-diversificar os produtos.

Reutilizar: a través das botellas recargables, os dispensadores a granel, os sistemas de depósito, devolución e retorno, e os sistemas de recuperación de envases, entre outros, pódese reducir o 30% da contaminación por plásticos de aquí a 2040. Co fin de materializar estas posibilidades, os gobernos deben axudar a crear un modelo de negocio máis favorable, atractivo e convincente en favor dos produtos reutilizables.

Reciclar: é posible reducir a contaminación por plásticos nun 20% adicional se a reciclaxe convértese nun negocio máis estable e rendible. A eliminación dos subsidios aos combustibles fósiles, a aplicación de directrices de deseño para mellorar a reciclabilidade e a posta en práctica doutras medidas aumentarían a proporción de plásticos economicamente reciclables do 21% ao 50%.

Reorientar e diversificar: os produtos plásticos presentes en envases, envoltorios de plástico, bolsiñas, artigos de comida rápida e similares poden ser remprazados con prudencia por produtos fabricados con materiais alternativos (como papel ou materiais compostables), o que suporía unha diminución adicional do 17% da contaminación por plásticos.

Plásticos dun só uso

Con todo, e aínda que se logren aplicar todas as medidas anteriores, en 2040 aínda haberá que tratar de forma segura 100 millóns de toneladas métricas de plásticos procedentes de produtos dun só uso e de vida curta, ademais do importante cúmulo de contaminación plástica existente.

Esta cuestión pode solucionarse mediante a creación e aplicación de normas de deseño e seguridade para eliminar os refugallos plásticos non reciclables, e mediante a atribución aos fabricantes da responsabilidade dos produtos que desprenden microplásticos, entre outras medidas.

Pola súa banda, no informe recoméndase que un marco fiscal mundial podería formar parte das políticas internacionais para permitir que os materiais reciclados compitan en igualdade de condicións cos materiais virxes, crear unha economía de escala para as solucións e establecer sistemas de seguimento e mecanismos de financiamento.

Fonte e imaxe: ONU Medio Ambiente