• Así se recolle nun estudo publicado por EAE Business School baixo o título “El problema del desperdicio de comida. Un análisis crítico”.
• Os dous tipos de alimentos que adoitan terminar no lixo son os que non cumpren cos estándares de venda (estética, tamaño, etc) e os produtos que, ao alcanzar a súa data de caducidade, deben ser refugados.
• Pola súa banda , o 70% dos restauradores entrevistados indicaron que son os clientes os que xeran máis residuos e o 69% manifesta que procura aproveitar dalgunha forma as sobras. 

Cerceda, a 25 de febreiro de 2021.- Segundo un estudo publicado por EAE Business School baixo o título “El problema del desperdicio de comida. Un análisis crítico”, e centrado primordialmente no desperdicio de alimentos, os comercios tradicionais xeran ata un 60% menos de refugallos alimentarios que os supermercados. A súa taxa de desperdicio (cociente entre o total de alimentos refugados e o de comprados) é do 4,7%, sendo os artigos máis refugados as froitas (30,8%), as verduras e hortalizas (13,5%) e os lácteos (12,6%).

Os dous tipos de alimentos que adoitan rematar no lixo son, por unha banda, os que non cumpren cos estándares de venda (cenoria  deforme, mazá moi pequena…) e  os produtos perecedoiros que, ao alcanzar a súa data de caducidade, deben ser refugados.

A  co-autora do estudo, Elena  Bulmer, sinala que “Nos países desenvolvidos, a meirande parte da comida pérdese na última fase da cadea de subministración. Un supermercado, con independencia do seu tamaño, xera unha gran cantidade de residuos, tanto polo seu tipo de actividade como pola variedade de inventario que manteñen e a necesidade de evitar o custo de imaxe que producen os produtos esgotados. Nun día de traballo débense xestionar residuos orgánicos, plástico, cartóns, vidro, latas e bidóns. Os supermercados teñen un gran impacto sobre os refugallos de alimentos debido aos cambios sobre o que significan as datas para a seguridade alimentaria, que fai que se refugue unha gran cantidade de alimentos comestibles”.

O informe apunta algunha das prácticas de economía circular. É o caso das políticas comerciais de redución de prezos dos produtos próximos á súa data de caducidade, ou ben a doazón aos propios empregados e a organizacións benéficas. Así mesmo, recomenda revisar as políticas de etiquetaxe para evitar confusións e custos económicos adicionais. 

Incide tamén na conveniencia de incrementar os artigos comercializados a granel e a reciclaxe de envases, e de xestionar de forma sostible a materia orgánica.

O DESPERDICIO DE COMIDA NA RESTAURACIÓN

O 70% dos restauradores entrevistados indicaron que son os clientes os que xeran máis residuos, mentres que o 9% considera que os refugallos alimentarios son consecuencia da comida non almacenada e non utilizada, e o 4% pensa que o desperdicio ten lugar na preparación dos menús.

O 66% dos cidadáns afirma levar as sobras dos restaurantes. O 81% cre que restaurantes e supermercados deberían doar os produtos non vendidos a asociacións. O 67% considera que debe haber unha mellor xestión do consumo; un 66%, que debe venderse ou reutilizar produtos refugables; un 58%, que se debería educar aos consumidores sobre a menor xeración de residuos; e un 53% recomenda a transformación dos produtos non vendidos en mollos, marmeladas e sopas.

Fonte: Retema

Imaxe: Pexels