• A Conferencia da ONU sobre cambio climático celebrarase en Exipto do 6 ao 18 de novembro.
• O pleno do PE quere que os países eleven os seus obxectivos climáticos para limitar o quecemento conforme ao Acordo de París.
• A institución europea identifica as crises do clima e a biodiversidade como un dos desafíos máis importantes que enfronta a humanidade, de aí que, desde hai tempo, presione para conseguir unha lexislación máis ambiciosa.

Cerceda, a 17 de outubro de 2022.-Ante a próxima Conferencia da ONU sobre cambio climático (COP27), que se celebrará en Exipto do 6 ao 18 de novembro, o pleno do Parlamento Europeo ten previsto pedir aos países da UE e do G20 que dean proba de liderado e se comprometan a reducir máis as súas emisións de gases de efecto invernadoiro.

A institución europea identifica as crises do clima e a biodiversidade como un dos desafíos máis importantes que enfronta a humanidade. Está preocupada polas conclusións do informe de brecha de emisións 2021 do PNUMA, no que se asegura que, mesmo se se implementan os obxectivos climáticos nacionais máis ambiciosos para 2030 anunciados na COP26 en Glasgow, o mundo camiña cara a un aumento de temperatura de 2,7 °C, situada moi por riba dos obxectivos do Acordo de París de limitar o quecemento global moi por baixo dos 2°C e alcanzar os 1,5 °C.

O Comité do PE indica que a guerra de Rusia contra Ucraína fai aínda máis urxente que transformemos o sistema enerxético global e teme que moitos plans climáticos nacionais atrasen os cambios esenciais ata despois de 2030. Por iso, os eurodeputados consideran que se deben tomar medidas urxentes nesta década, á vez que sinalan que moitas promesas de emisións netas cero a longo prazo son ambiguas e carecen de transparencia.

LEXISLACIÓN MÁIS AMBICIOSA

O Parlamento, que declarou a emerxencia climática o 28 de novembro de 2019, presiona desde hai tempo para conseguir unha lexislación da UE máis ambiciosa sobre o clima e a biodiversidade. En xuño de 2021 adoptou a Lei do Clima, que transforma o compromiso político do Pacto Verde de alcanzar a neutralidade climática en 2050 nunha obrigación vinculante para a UE e os Estados membros. Ademais, a nova normativa eleva o obxectivo de redución das emisións de gases de efecto invernadoiro para 2030 do 40% ata polo menos o 55%, en comparación con 1990.

O PE está agora negociando cos Estados membros sobre as medidas incluídas no paquete “Obxectivo 55 para 2030” para axudar á UE a alcanzar obxectivos máis ambiciosos.

A resolución subliña a importancia do financiamento climático para o éxito das accións climáticas e lembra que a UE é o maior contribuínte.

Será votada polo pleno da Cámara durante a sesión plenaria do 17 ao 20 de outubro.

Fonte: Parlamento Europeo

Imaxe: Pixabay