• Integrada por persoas con enfermidade mental, a asociación pretende instaurar o as boas prácticas ambientais, constituíndo a correcta xestión dos residuos un dos grandes pasos a dar.
• Os educadores ao servizo de Sogama profundarán no principio dos tres erres, así como na necesidade de minimizar o desperdicio alimentario e poñer en valor a materia orgánica a través da súa conversión en compost.

Cerceda, a 6 de novembro de 2019.-  Os usuarios adscritos á Asociación Avelaíña de A Guarda (Pontevedra), entidade sen ánimo de lucro integrada por persoas con enfermidade mental, así como por familiares, coidadores e, en xeral, cidadáns sensibilizados con este problema de saúde, recibirán o próximo 8 de novembro a visita dos educadores de Sogama para aprender un pouco máis sobre sostibilidade.

Cun enfoque eminentemente pedagóxico e adaptado ás características deste colectivo, explicaráselles a importancia que ten coidar o medio ambiente a través da xestión sostible dos residuos urbanos. Para isto, os monitores profundarán no principio dos tres erres (reducir, reutilizar e reciclar), trasladando as claves para minimizar a produción de lixo, para alongar a vida útil dos produtos a través da reutilización e para contribuír á reciclaxe dos mesmos, unha vez convertidos en refugallos, facéndose necesario proceder á súa separación en orixe e correcto depósito nos diferentes contedores de recollida selectiva.

Así mesmo, proporcionaranse as claves para unha alimentación equilibrada e saudable, e tamén para diminuír o desperdicio alimentario, un problema asentado en todo o mundo por diversas circunstancias. Nos países desenvolvidos, por un consumismo excesivo e, nos menos desenvolvidos, por non dispoñer de sistemas axeitados de almacenamento, transporte e comercialización.

Comprar só o que se precise, diferenciar entre data de caducidade e data de consumo responsable, axustar as racións ao número de comensais e aproveitar as sobras para elaborar novos menús, constitúen sinxelos xestos cos que reducir en gran medida a cantidade de comida que a diario acaba no cubo de lixo.

E para os restos alimentarios non comestibles e restos vexetais, a compostaxe constitúe unha magnífica opción. De feito, esta asociación conta cun composteiro no que a materia orgánica xerada no centro cobra valor a través da súa transformación en abono natural de alta calidade.

Saúdos, Departamento de Comunicación