• PlanB proporciona un modelo de doazón fiable que permite canalizar a solidariedade de maneira eficiente e segura, posibilitando que cada doazón teña un impacto positivo e duradeiro na sociedade, e apoie a aqueles que máis o necesitan

Cerceda, a 19 de novembro de 2024.- Os Bancos de Alimentos deron un paso ao fronte e apostaron de forma decidida por un cambio de modelo na prestación dos seus servizos, garantindo desta forma un sistema de doazón en favor das persoas e o planeta.

Abordan así un proxecto innovador, denominado PlanB, a través do cal se asegura o cumprimento da nova lei de Prevención de Perdas e Desperdicio Alimentario (LPPDA), seguridade reputacional e certificación de desgravación fiscal, posibilitando unha xestión óptima dos excedentes alimentarios.

Grazas a PlanB, o proceso de doazón será máis fácil e intuitivo, xa que conta cunha plataforma dixital propia planb.org.es que, ademais de simplificar o proceso, ofrece a posibilidade de contar coa rastrexabilidade de cada contribución, asegurando que as doazóns teñan un impacto social, xusto e equitativo a través da súa rede, conformada por 7.000 entidades benéficas auditadas.

O proxecto, financiado pola Unión Europea con Fondos Next Generation, posibilita un potente nexo entre todos os membros da cadea, permitindo que os Bancos de Alimentos continúen a ser o referente na loita contra o desperdicio.

PlanB posúe unha gran capilaridade nacional, xa que conta con 54 Bancos de Alimentos e unha ampla rede de contactos con entidades benéficas, propiciando que as doazóns cheguen a quen máis o necesitan en todas as rexións do país e se aborden as necesidades de maneira integral.

Tal e como manifestou o presidente de FESBAL (Federación Española de Bancos de Alimentos), “os 30 anos de experiencia dos Bancos de Alimentos consolídannos como un referente na loita contra o desperdicio alimentario, grazas a unha extensa rede de colaboradores e voluntarios”, ao que engadiu que “os Bancos de Alimentos evitaron o desperdicio de 400.000 toneladas de alimentos no último lustro e 79.077 toneladas no 2023”.

A seguridade reputacional constitúe tamén unha prioridade para o proxecto, xa que os Bancos de Alimentos son unha organización cunha imaxe social consolidada ao longo de tres décadas. En 2023, distribuíu 138.046 toneladas de produtos a través de 6.493 entidades benéficas.

 Fonte e imaxe: IndustriAmbiente