• A única saída que na actualidade se está a dar a estes  subprodutos é a alimentación animal ou a eliminación directa.
• O proxecto busca explotar a biomasa mariña mediante o desenvolvemento de solucións de almacenamento, tecnoloxías de clasificación e ferramentas de decisión que garantan un sistema de subministración  eficiente e sostible para as materias primas secundarias procedentes das actividades deste sector.
• Cun orzamento asignado superior a 4 millóns de euros e unha duración de 4 anos, WaSeaBi arrincou o pasado mes de maio en Copenhague.
• No mesmo participan 13 socios de Dinamarca, Suecia, España, Francia e Bélxica.

Cerceda, a 4 de xuño de 2019.- A cadea de valor da pesca e a acuicultura ten un peso importante na economía da Unión Europea, xerando unha facturación global de case 28.000 millóns de euros, ademais de dar emprego ao redor de 122.000 persoas.

Non obstante, o sector enfróntase ao desafío de xestionar de forma axeitada os subprodutos procedentes da pesca e da acuicultura como é o caso de vísceras, sobrantes ou peixes de escaso valor comercial, que representa aproximadamente 1,5 millóns de toneladas sobre as 5,1 millóns de toneladas de peixe capturado. A única saída que na actualidade se está a dar a estes  subprodutos é a alimentación animal ou a eliminación directa.

Así as cousas, faise necesario levar a cabo unha xestión máis sostible deses  subprodutos e darlles un valor superior, sendo este precisamente o obxectivo  do proxecto europeo WaSeaBi, no que participan 13 socios de Dinamarca, Suecia, España, Francia e Bélxica.

AZTI, centro tecnolóxico con sede en Vizcaya experto na cadea de valor do mar, liderará un dos grupos de traballo desta iniciativa, que se encargará de obter compostos de alto valor derivados dos produtos xerados.

Tal e como explica Bruño Iñarra, responsable en AZTI  do proxecto, traballarán con oito  correntes ou materias primas secundarias como é o caso das augas de cocción e as cunchas dos moluscos ou descartes pesqueiros, elementos que servirán, por exemplo, para a obtención de aromas para consumo alimentario, suplementos minerais para uso humano e animal ou péptidos bioactivos para uso en alimentación animal.

O proxecto, que arrincou o pasado mes de maio en Copenhague, ten un orzamento asignado superior a 4 millóns de euros e unha duración de 4 anos e busca explotar a biomasa mariña mediante o desenvolvemento  de solucións de almacenamento, tecnoloxías de clasificación e ferramentas de decisión que garantirán un sistema de subministración eficiente e sostible para as materias primas secundarias procedentes da acuicultura, a pesca e as industrias de procesado.

O 77% do financiamento deste proxecto procede da ferramenta Bio Based Industries Join Undertaking, dentro do programa de investigación e innovación da Unión Europea Horizonte 2020.

Fonte: Azti

Imaxe: Pixabay

Saúdos, Departamento de Comunicación