• A iniciativa pretende crear unha contorna de colaboración onde humanos e robots compartan labores de manipulación e tratamento de residuos, así como de recuperación dos recursos que conteñen.
• Ademais, este innovador sistema busca aumentar a capacidade de tratamento, conseguir produtos de máis calidade e valor económico, mellorar as condicións de traballo das persoas, mitigar o impacto ambiental e contribuír á economía circular.
• O proxecto conta coa participación de 13 socios de diferentes países europeos e está financiado pola Comisión Europea con case 7 millóns de euros.

Cerceda, a 2 de decembro de 2019.- Se ben nas últimas décadas lográronse importantes avances tecnolóxicos na reciclaxe de aparellos eléctricos e electrónicos, a xestión destes residuos resulta aínda complexa e, polo tanto, con grandes posibilidades de mellora.

Algunhas das fases que comprende a xestión de RAEE son a súa clasificación, descontaminación, liberación de pezas ou conxuntos reutilizables, e separación de materiais nas fraccións xeradas tralo tratamento dos equipos descontaminados. Gran parte das actividades asociadas a esas operacións demandan unha cantidade considerable de man de obra, requirindo dos operarios experiencia, habilidade, esforzo e moitos movementos repetitivos.

Neste contexto, xorde o proxecto europeo HR-Recycler (2018-2022), cuxo obxectivo é explorar a evolución dalgunhas das tarefas manuais (como a clasificación dos aparellos, o seu desensamblado ou a clasificación de pezas e materiais extraídos) que resultan custosas e perigosas, ademais de consumir moito tempo, e substituílas  por procedementos automáticos. Trátase de crear unha contorna de colaboración, onde humanos e robots compartan labores de manipulación e tratamento de residuos, así como de recuperación dos recursos que conteñen.

Ademais, este innovador sistema busca aumentar a capacidade de tratamento, conseguir produtos de máis calidade e valor económico, mellorar as condicións de traballo das persoas, mitigar o impacto ambiental e contribuír á economía circular.

SOCIOS E FINANCIAMENTO

O proxecto conta coa participación de 13 socios de diferentes países europeos, entre eles o Centro Tecnolóxico Gaiker, que se encargará de aplicar e ensaiar a tecnoloxía de robots colaborativos na xestión de residuos complexos que chegaron ao final da súa vida útil. Así mesmo, aplicará a metodoloxía de análise do ciclo de vida social (SLAC) ás colaboracións entre humanos e robots.

Financiado con case 7 millóns de euros pola Comisión Europea dentro do seu programa Marco de Investigación e Desenvolvemento Tecnolóxico Horizonte 2020, este proxecto está coordinado polo centro grego CERTH (Centre for Research and Technology Hellas).

Fonte: Gaiker

Imaxe: Pixabay

Saúdos, Departamento de Comunicación