• As materias primas para obter estes cementos e formigóns avanzados serán os propios residuos de construción e demolición, así como as escouras siderúrxicas de fornos de arco eléctrico.
• Apoiado polo CDTI, está conformado por un consorcio de 5 empresas coas que o centro tecnolóxico CETIM colaborará no ámbito da investigación, formulación e obtención dos novos materiais xeopolíméricos, así como na avaliación económica e ambiental dos produtos e procesos desenvolvidos.
• O proxecto terá unha duración de 3 anos.

Cerceda, a 31 de agosto de 2021.- Durante os próximos 3 anos, o centro tecnolóxico CETIM colaborará no proxecto KEOPS, cuxo obxectivo é a obtención de cementos e formigóns máis sostibles, implantando a circularidade no sector da construción.

As materias primas para obter estes cementos e formigóns avanzados serán os propios residuos de construción e demolición, así como as escouras siderúrxicas de fornos de arco eléctrico.

Ademais, os devanditos formigóns serán produtos de maior valor engadido que os convencionais, grazas ás propiedades intrínsecas que se agardan alcanzar. Así, buscaranse solucións cementantes sostibles baseadas no emprego de  xeopolímeros (cementos alcalinos), implantando estratexias de economía circular a través da valorización de residuos de alto impacto ambiental e volume, principalmente os Residuos de Construción e Demolición ( RCDs), así como os procedentes da industria de produción de aceiro.

MARCO DE REFERENCIA

O sector da construción representa o 40% do consumo total da enerxía da UE, o 35% das súas emisións de gases de efecto invernadoiro, un terzo do seu consumo de auga e un terzo dos residuos xerados. Pola súa banda, o principal material usado é o cemento Portland, a segunda fonte de emisións de CO2 a nivel global, ademais dun gran consumidor de recursos.

Apoiado polo CDTI, o proxecto KEOPS está conformado por un consorcio de 5 empresas (ADEC Global, Cromogenia, Cementos Cruz, Extraco e Prefhorvisa) coas que  CETIM colaborará no ámbito da investigación, formulación e obtención dos novos materiais  xeopolíméricos, participando igualmente na avaliación económica e ambiental dos produtos e procesos desenvolvidos co fin de garantir a súa viabilidade.

Esta agrupación de empresas abarca toda a cadea de valor necesaria para o desenvolvemento e a optimización de solucións cementantes integralmente sostibles.  KEOPS conecta ao xestor dos residuos, primeiro elo da cadea, cos aplicadores finais dos novos produtos, incorporando ademais ás industrias produtoras dos cementos e dos seus aditivos específicos, como elos intermedios.

Durante os 3 anos de duración de KEOPS, a área de Materiais Avanzados de CETIM participará no desenvolvemento do material cementante xeopolimérico base e dos diversos formigóns  xeopolímeros, optimizando as formulacións para a súa fabricación posterior. Prevese tamén que, en colaboración con ADEC Global, se desenvolva unha aplicación blockchain que permita rexistrar a trazabilidade dos precursores e áridos, podendo así verificar a súa procedencia e os procesos aos que foron sometidos.

Fonte e imaxe:  CETIM