• Nesta edición, valorouse o desenvolvemento de ferramentas propias e innovadoras que apoian a revisión das estratexias de negocio, consideran as cuestións ambientais de forma integral ou supoñen un cambio no modo de operar.
•  A convocatoria incluíu cinco categorías: xestión, produto/servizo, proceso, cooperación empresarial internacional, e empresa e biodiversidade, presentándose 115 candidaturas.
•  Na categoría de xestión, resultou premiada a iniciativa proposta por Naturgy, orientada a unha transición enerxética e un novo enfoque de negocio cara á sostibilidade.

Cerceda, a 2 de novembro de 2020.- En días pasados celebrouse a entrega dos Premios Europeos de Medio Ambiente á Empresa 2019/2020, cuxa sección española coordina a Fundación Biodiversidade. O acto estivo presidido pola Súa Maxestade o Rei.

Nesta edición recoñecéronse apostas ambiciosas a nivel de xestión ou nas que o medio ambiente representa o principal valor engadido para a empresa. Tívose en conta o desenvolvemento de ferramentas propias e innovadoras que apoian a revisión das estratexias de negocio, consideran as cuestións ambientais de forma integral ou supoñen un cambio no modo de operar. Tamén se puxo énfase na pequena empresa, cuxo esforzo en relación ao seu tamaño supón unha decidida aposta empresarial e representa, ademais, un excelente nicho de innovación.

Os Premios Europeos de Medio Ambiente á Empresa, da Dirección Xeral de Medio Ambiente da Comisión Europea, convócanse desde 1987 co fin de recoñecer a aquelas empresas que destacan polo seu comportamento ambiental.

CATEGORÍAS E EMPRESAS GALARDONADAS

A convocatoria 2019/2020 destes premios incluíu cinco categorías: xestión, produto/servizo, proceso, cooperación empresarial internacional, e empresa e biodiversidade, presentándose á mesma115 candidaturas representativas do amplo abano de sectores de actividade da economía española, como o enerxético, o alimentario, o industrial, os servizos e a agricultura e a pesca, entre outros.

O xurado, conformado por 16 expertos en sostibilidade e empresa, decidiu os premiados por unanimidade, cun total de 10 gañadores e 15 accésit. Así mesmo, designou as 12 candidaturas que participarán na edición europea destes premios, que se celebrará o próximo 3 de novembro. 

Na categoría de xestión resultou premiada a iniciativa proposta por Naturgy, orientada a unha transición enerxética e un novo enfoque de negocio cara á sostibilidade.

Como pequena empresa recoñeceuse un proxecto de Tecnoresiduos R3 pola súa xestión de residuos baseada na súa credibilidade, valor engadido e competencia na súa certificación EMAS desde o comezo da súa actividade.

Na segunda categoría, produto/servizo, foi premiada a proposta de FCC Medio Ambiente pola innovación na posta en marcha de vehículos pesados 100% eléctricos para a prestación de servizos urbanos. Como pequena empresa, SOUJI foi recoñecida por ofrecer unha solución innovadora e sinxela para reutilizar no propio fogar o aceite vexetal, transformándoo en xabón.

Na categoría proceso, foi galardonado o proxecto elaborado por Cepsa Química, que aposta pola mellora na fabricación dun compoñente dos deterxentes de uso doméstico, que implica menos consumo de recursos naturais e menos residuos perigosos. Agroamb Prodalt foi recoñecida como pequena empresa grazas a un proxecto no ámbito dos residuos biodegradables para o sector agroalimentario cun proceso alternativo ao actual de compostaxe e dixestión anaerobia. 

Na categoría cooperación empresarial internacional, premiouse unha iniciativa presentada por Acciona, que consiste nun programa, exemplo de alianza público-privada, de acceso a enerxía, auga e saneamento sostibles e fiables a comunidades rurais illadas do estado mexicano de Oaxaca. 

Como pequena empresa, Basoinsa foi galardoada por levar a transferencia metodolóxica en materia de restauración ecolóxica e xestión dos sistemas fluviais en Cundinamarca (Colombia). 

Finalmente, na categoría empresa e biodiversidade, o premio a gran empresa recaeu na solución integral ao reto do auga nas súas operacións e unha sólida aposta de compensación de pegada hídrica ligada a restauración ambiental de espazos protexidos e cultivos sostibles en territorio andaluz que está levando a cabo Heineken España. Pola súa banda, Cantueso Natural Seeds foi premiada como pequena empresa pola súa aposta pola bioeconomía, coa recolección sostible e provisión de planta autóctona, que axuda a incrementar a biodiversidade en espazos urbanos, a restauración de solos en agricultura, así como a restauración ambiental e paisaxística en obras públicas.

Fonte: Fundación Biodiversidade

Imaxe: Pixabay