• Así o asegurou a ONU con motivo do Día Internacional de Residuos Cero, celebrado o pasado 30 de marzo, incidindo na necesidade de actuar no sector da moda e os téxtiles para minorar o seu impacto ambiental, económico e social
• Cada ano, o sector téxtil produce entre o 2% e o 8% das emisións mundiais de gases de efecto invernadoiro, e utiliza 215 billóns de litros de auga, o equivalente a 86 millóns de piscinas olímpicas

Cerceda, a 1 de abril de 2025.- O pasado domingo, 30 de marzo, conmemorouse o Día Internacional de Residuos Cero baixo o lema “Cara a cero residuos na moda e os téxtiles”, salientando así a necesidade de actuar neste sector para reducir a produción de refugallos e promover solucións circulares.

O rápido crecemento da produción e o consumo de téxtiles está a superar os esforzos de sostibilidade no sector, o que xera graves impactos ambientais, económicos e sociais. A produción de roupa duplicouse entre 2000 e 2015, e xéranse 92 millóns de toneladas de residuos téxtiles a nivel mundial (un camión de roupa por segundo). Cada ano, o sector téxtil produce entre o 2% e o 8% das emisións mundiais de gases de efecto invernadoiro, e utiliza 215 billóns de litros de auga, o equivalente a 86 millóns de piscinas olímpicas

Como consumidores, podemos contribuír a aliviar esta situación afastándonos da moda rápida e investindo en roupa duradeira e de alta calidade, que non só conserva recursos, senón que tamén respecta os enfoques tradicionais de sostibilidade. Se duplicásemos o número de veces que usamos unha peza, reduciriamos as emisións de gases de efecto invernadoiro nun 44%

O ámbito privado debe asumir a súa responsabilidade deseñando produtos duradeiros, reparables e reciclables, á vez que adopta modelos de negocio circulares que freen a contaminación química, reduzan os volumes de produción, utilicen materiais sostibles e contribúan á recuperación da biodiversidade. A innovación e a rendición de contas deben guiar as estratexias empresariais.

Neste sentido, os gobernos desempeñan un papel fundamental ao aplicar esquemas de Responsabilidade Estendida do Produtor (REP), regular os produtos químicos nocivos, investir en infraestrutura de reciclaxe e incentivar modelos comerciais sostibles para impulsar a transición cara a unha economía circular.

A nivel global, os fogares, as pequenas empresas e os provedores de servizos públicos xeran entre 2.100 e 2.300 millóns de toneladas de residuos urbanos ao ano, desde envases e aparellos electrónicos ata plásticos e alimentos. Con todo, os servizos globais de xestión de residuos non están preparados para xestionar esta situación. Un total de 2.700 millóns de persoas carecen de acceso á recollida de residuos e só entre o 61 % e o 62 % xestiónanse en instalacións controladas.

Fonte: ONU

Imaxe: Freepik