• No informe “As cidades do Mundo 2020”, móstrase o valor da urbanización sostible e como pode contribuír aos esforzos globais para reconstruír mellor logo da crise.
• ONU Hábitat asegura que unha urbanización ben planificada e xestionada pode axudar aos países a acelerar o seu crecemento económico e servir como unha canle cara aos mercados globais, creando contornas produtivas que atraian o investimento internacional e aumenten a eficiencia económica.

Cerceda, a 9 de novembro de 2020.- En torno ao 55% das persoas residen en áreas urbanas e todo apunta a que esta porcentaxe roldará o 70% no ano 2050.

As cidades estiveron no epicentro da pandemia de COVID-19, rexistrándose nas mesmas o 95% dos casos. A medida que os países se dirixen cara a unha recesión severa, as áreas urbanas, que representan máis do 80% do PIB mundial, veranse afectadas de distintas formas, advirte un informe publicado por ONU Hábitat.

Presentado o Día Mundial das Cidades (31 de outubro), no documento “As Cidades do Mundo 2020”, móstrase o valor da urbanización sostible e como pode contribuír aos esforzos globais para reconstruír mellor logo da crise. Así mesmo, enfatiza o papel da Nova Axenda Urbana, o plan de 20 anos da ONU como  folla de ruta para lograr o desenvolvemento sostible e combater o cambio climático.

Tamén analiza o valor da urbanización desde unha perspectiva económica, social e medioambiental, así como o que os autores denominan “o valor non cuantificable”, que dá ás cidades o seu carácter único.

O informe asegura que, a partir de políticas macroeconómicas axeitadas, unha urbanización ben planificada e xestionada pode axudar aos países a acelerar o seu crecemento económico e servir como unha canle cara aos mercados globais, creando contornas produtivas que atraian o investimento internacional e aumenten a eficiencia económica.

ONU Hábitat explicou que as cidades xeran valor económico cando funcionan de xeito eficiente, propiciando valor ambiental aquelas que teñen centros urbanos transitables, o que leva a unha redución da súa pegada de carbono xeral.

O documento agrega que aspolíticas urbanas tamén poden reducir as desigualdades sociais e, cando as urbes están ben planificadas e administradas, crean valor intanxible ao inculcar o orgullo cívico e servir como centros de tradicións culturais.

Fonte: ONU

Imaxe: Pixabay