![SIGAUS recuperó el pasado año en Galicia cerca de 11 millones de litros de aceite industrial usado SIGAUS recuperó el pasado año en Galicia cerca de 11 millones de litros de aceite industrial usado](/sites/default/files/noticias/image/2022-08/cambiodeaceitecoche.jpg)
- A elevada dispersión territorial esixe un ambicioso sistema loxístico co que chegar a todos os recunchos da comunidade.
- 5.460 establecementos xeraron aceites usados en 2018, sendo o 53% talleres de reparación de vehículos.
- En total, realizáronse 12.175 recollidas, a máis frecuente apenas 870 quilos, dato que corrobora o esforzo desta entidade en atender ao conxunto da xeografía galega.
- A xuízo de Eduardo de Lecea, director xeral de SIGAUS, “A xestión dos aceites industriais usados en Galicia é un bo exemplo de proxectos de Economía Circular que están a funcionar xa de forma eficaz e sostible”.
Cerceda, a 29 de agosto de 2019.- O sistema encargado en España da xestión do aceite industrial usado, SIGAUS, logrou recuperar en Galicia o pasado ano preto de 11 millóns de litros, efectuando a recollida en case 5.500 puntos distintos. O resultado non podía ser mellor: 2 millóns de litros de novos lubricantes retornados ao mercado e máis de 8.000 toneladas de CO2 aforradas.
Na nosa comunidade recolléronse 9.656 toneladas brutas (incluíndo a auga e sedimentos cos que o aceite usado adoita presentarse), o que equivale a 39 toneladas cada día laborable do ano.
É preciso recordar que o residuo que xeran os lubricantes utilizados nos motores dos vehículos e na industria está catalogado como perigoso, polo que o seu impacto sobre o medio ambiente, de non ser tratado correctamente, podería ser importante.
Así mesmo, a súa recollida esixe un ambicioso sistema loxístico que permita chegar a todos os recunchos, xa que a amplísima diversidade de usos do aceite industrial provoca que a xeración do seu residuo tamén sexa extremadamente fragmentada e dispersa, circunstancia á que habería engadir as particulares características pobocionais do territorio galego
En Galicia, 5.460 establecementos xeraron aceites usados en 2018. Por tipoloxías, o 53% foron talleres de reparación de vehículos. Xunto a eles, recolleuse residuo en máis de 800 industrias e varios miles máis de instalacións de diverso tipo (desde construción a agricultura, hostalería ou outros servizos). En total, realizáronse 12.175 recollidas (49 recollidas cada día laborable do ano), sendo a máis frecuente de apenas 870 quilos.
Recolleuse aceite usado en 291 municipios galegos (que abarcan case o 99% da poboación), incluíndo 209 localidades rurais nas que o sistema articulado por SIGAUS contribúe á protección da contorna por ser zonas de maior despoboación, prestando adicionalmente un servizo de valor para o tecido económico local.
DE RESIDUO A RECURSO
Unha vez recollido, o aceite usado trasládase a instalacións especializadas para a súa análise e tratamento. En concreto, Galicia conta con 12 infraestruturas destas características que participan contractualmente con SIGAUS.
Tras separar o aceite neto de auga e sedimentos, o residuo cobra unha nova vida como lubricante ou como combustible industrial, facendo posible que sexa aproveitado na súa totalidade.
A cantidade de aceite usado neto finalmente xestionado e valorizado por parte de SIGAUS na nosa comunidade foi de 10,8 millóns de litros. Un 28% do mesmo destinouse a rexeneración, o tratamento prioritario que permite extraer aceites base, que son o compoñente fundamental na fabricación de novos lubricantes. O segundo posible tratamento para o aceite usado é a súa descontaminación para fabricar combustible de uso industrial, evitando con isto a utilización doutros tradicionais como o fuel óleo. Grazas a isto obtívose unha enerxía equivalente 76 GWh, similar á consumida en usos eléctricos por 21.680 fogares.
NO BO CAMIÑO
Eduardo de Lecea, director xeral de SIGAUS, sinala ao respecto que “A xestión dos aceites industriais usados en Galicia é un bo exemplo de proxectos de Economía Circular que están a funcionar xa de forma eficaz e sostible. Facémolo posible cun residuo complexo e de custosa xestión, grazas ao compromiso das empresas involucradas, ao impulso da Administración e á conciencia cidadá. Entre todos, debemos seguir avanzando cara a este novo modelo de crecemento, máis innovador e intelixente, no que os residuos que se recollen nas cidades e nos pobos de España convértense en recursos. O camiño xa non ten volta atrás”.
Fonte e imaxe: SIGAUS
Saúdos, Departamento de Comunicación