• Orientouse aos alumnos/as do Ciclo Superior de Química e Saúde Ambiental, con idades comprendidas entre os 18 e os 22 anos.
• Na mesma abordáronse distintas temáticas tales como a problemática que representa a elevada produción de refugallos, a importancia do principio dos tres erres (Redución, Reutilización e Reciclaxe), a valorización da materia orgánica e, por suposto, a actividade de Sogama.

Cerceda, a 2 de febreiro de 2021.- Técnicos de Sogama desprazáronse a Santiago de Compostela para impartir unha sesión formativa no CIFP Politécnico e dirixida a alumnos/as do Ciclo Superior de Química e Saúde Ambiental, con idades comprendidas entre os 18 e os 22 anos.

Dado que unha das unidades didácticas impartidas neste curso versa sobre a xestión e o tratamento dos residuos urbanos, profundouse na problemática que representa a elevada produción de refugallos nas sociedades modernas, a importancia de practicar o consumo responsable, como aplicar cada día o principio dos tres erres (Redución, Reutilización e Reciclaxe) e como levar a cabo unha correcta selección dos materiais en orixe para propiciar a súa posterior transformación en novos produtos, aforrando desta forma materias primas e enerxía.

VALORIZACIÓN DE RESIDUOS NO SISTEMA SOGAMA

Así mesmo, explicouse a actividade de Sogama, cuxa xestión oriéntase, de forma prioritaria, cara á reciclaxe, procedendo á recuperación enerxética da fracción non reciclable. Coa ampliación do seu Complexo Medioambiental de Cerceda, cuxa capacidade de tratamento subiu desde as 550.000 toneladas/ano a 1.000.000, a Sociedade, non só incrementará a súa contribución á reciclaxe, senón que xa conseguiu chegar ao vertido técnico cero 15 anos antes do estipulado polo Parlamento Europeo.

A súa nova planta de clasificación de materiais, que opera en liña coa industria 4.0, permítelle recuperar, a través de sistemas automáticos de última xeración, ata 11 tipoloxías de residuos para ser remitidas á industria recicladora.

Neste sentido, cabe recordar que o vertedoiro constitúe o último elo na xestión xerarquizada de residuos establecida pola Unión Europea dado o seu negativo impacto para o medio ambiente e a saúde.

Incidiuse tamén na firme aposta de Sogama pola valorización da materia orgánica a través da compostaxe, tanto doméstica como industrial. No caso da primeira, a entidade repartiu a día de hoxe preto de 15.000 composteiros entre 358 entidades (concellos, centros educativos e colectivos sociais).

Respecto da industrial, conta cunha planta de compostaxe en Cerceda, que dá servizo aos concellos máis próximos, e abordará tamén a construción e xestión doutras tres plantas de biorresiduos (provincias de Pontevedra, Lugo e Ourense) que virán a complementar as públicas e privadas, tanto actuais como futuras, para que Galicia poida dar debido cumprimento aos obxectivos europeos en materia de residuos.

A sesión concluíu cunha chamada de atención cara á necesidade de contribuír a un modelo de desenvolvemento baseado na economía circular, propiciando que os produtos se manteñan na economía o maior tempo posible, minimizando a produción de residuos e, unha vez xerados, converténdoos en recursos.

Saúdos, Departamento de Comunicación